काठमाडौं । एयरक्राफ्ट निर्माता एयरबसले बुधबार पहिलो सी-२९५ विमान भारतीय वायुसेनालाई हस्तान्तरण गरेको छ।

भारतीय वायुसेनाको विमानलाई अत्याधुनिक बनाउन दुई वर्षअघि २१ हजार ९३५ करोड रुपैयाँको विमान सम्झौता भएको थियो ।

यस अनुसार एयरबस डिफेन्स एन्ड स्पेस कम्पनीले भारतीय वायुसेनालाई ५६ सी–२९५ विमान हस्तान्तरण गर्नुपर्नेछ ।

यो विमान स्पेनको सेभिल सहरमा वायुसेना प्रमुख एयर चिफ मार्शल वीआर चौधरीलाई हस्तान्तरण गरिएको हो ।

यस सम्झौता अन्तर्गत विमान निर्माता एयरबसले सन् २०२५ सम्ममा सेभिलस्थित आफ्नो उत्पादन केन्द्रबाट उडान गर्न सक्ने १६ वटा विमान उपलब्ध गराउनु पर्ने छ ।

र बाँकी ४० विमान दुई कम्पनीको सहकार्यमा भारतको टाटा एडभान्स सिस्टम्सको उत्पादन केन्द्रमा निर्माण र एसेम्बल गरिनेछ।

गत अक्टोबरमा, प्रधानमन्त्री नरेन्द्र मोदीले वडोदरामा निर्माण केन्द्रको शिलान्यास गरेका थिए, जहाँ निजी कम्पनीहरूको उद्यममा पहिलो पटक सैन्य विमानहरू निर्माण हुनेछन्।