काठमाडौं । जापानको याकुशिमा टापु नजिकै अमेरिकी सेनाको विमान दुर्घटना भएको छ । विमानमा आठ अमेरिकी सैनिक सवार थिए ।

जापानी कोस्ट गार्डले बीबीसीलाई भनेअनुसार उद्धारकर्मीहरूले घटनास्थलमा सास फेर्न नसकेका एक व्यक्तिलाई भेटेका थिए।

सरकारी अधिकारीहरूलाई उद्धृत गर्दै स्थानीय सञ्चारमाध्यमले विमानको भग्नावशेष याकुशिमामा फेला परेको हुन सक्ने बताएको छ।

जापानको सरकारी मिडिया एनएचकेले रिपोर्ट गरेअनुसार सीभी-२२ ओस्प्रे विमान याकुशिमा एयरपोर्टमा अवतरण गर्न खोजिरहेको थियो जब यसको बायाँ इन्जिनमा आगो लाग्यो।

यो विमान यामागुची क्षेत्रको इवाकुनी बेसबाट ओकिनावाको काडेना बेसका लागि उडेको बताइएको छ ।

समाचार एजेन्सी रोयटर्सको रिपोर्टका अनुसार जापानका मुख्य क्याबिनेट सचिव हिरोकाजु मात्सुनोले स्थानीय समय अनुसार १४:४० मा विमान राडारबाट हराएको बताए।

कोस्ट गार्डले भनेअनुसार सात मिनेट पछि विमानबाट एक आपतकालीन सन्देश प्राप्त भयो। जसपछि विमान दुर्घटना भएको थियो ।