काठमाडौं । अमेरिकी डलरको तुलनामा नेपाली रूपैयाँ इतिहासकै कमजोर विन्दुमा पुगेको छ । भारतीय रूपैयाँ डलरको तुलनामा कीर्तिमानी न्यून विन्दुमा झरेपछि नेपाली रूपैयाँ पनि न्यून विन्दुमा झरेको हो ।

डलरसँग नेपाली रूपैयाँको प्रत्यक्ष विनिमय दर निर्धारित छैन । नेपाली रूपैयाँको भारतीय रूपैयाँसँग स्थिर विनिमय दर छ । अन्य विदेशी मुद्रासँग नेपाली मुद्राको विनिमय दर ती मुद्राको भारतीय रूपैयाँसँगको विनिमय दरका आधारमा निर्धारण गरिन्छ । त्यसैले भारतीय रूपैयाँ कमजोर हुँदा नेपाली रूपैयाँ स्वतः कमजोर हुन्छ ।

सोमबार भारतीय रुपैयाँ अमेरिकी डलरको तुलनामा अहिलेसम्मकै न्यून स्तरमा झरेर ८४.३८ मा पुगेको हो । डोनाल्ड ट्रम्पले अमेरिकामा राष्ट्रपति चुनाव जितेपछि आफ्नो दोस्रो कार्यकालमा आयातित सामानमा कर बढाउने डर छ । यसको प्रभाव चिनियाँ युआन र भारतीय रुपैयाँमा लगातार देखिन थालेको छ ।

चीनले अमेरिकी राष्ट्रपति डोनाल्ड ट्रम्पको दोस्रो कार्यकालका चुनौतीहरूको सामना गर्न र आफ्नो सुस्त अर्थतन्त्रलाई पुनरुत्थान गर्न नयाँ उपायहरू गरिरहेको छ।

ट्रम्पले चुनाव जित्नका लागि गरेका वाचामध्ये चिनियाँ उत्पादनमा ६० प्रतिशतसम्म भारी आयात शुल्क लगाउने पनि समावेश थियो।