काठमाडाैं। आप्रवासी तस्करी र तस्करी गर्न प्रयोग गरिने अमेरिका र मेक्सिकोबीचको गोप्य सीमापार सुरुङ सिल गरिने मेक्सिकन सीमा अधिकारीहरूले बताएका छन्।

मेक्सिकोको सिउडाड जुआरेज र टेक्सासको एल पासोको बीचमा रहेको तीन सय मिटर लामो सो सुरुङ गत हप्ता मात्र पत्ता लागेको थियो। अमेरिकी सीमा गस्ती प्रहरीले सुरुङको प्रवेशद्वार अस्तित्वका बारेमा आफ्ना मेक्सिकन समकक्षीहरूलाई सचेत गराएपछि जनवरी १० मा सुरुङ पत्ता लागेको हो।

सुरुङ भत्किनबाट जोगाउन काठका बीमहरूले बलियोगरी बनाइएको तथा प्रकाश र भेन्टिलेसनको समेत व्यवस्था गरिएको छ। यस्तो संरचना निर्माण गर्न कम्तिमा एक वर्ष लाग्न सक्ने सेनाका अधिकारीहरूले अनुमान गरेका छन्।

सुरुङ निर्माणमा स्थानीय अधिकारीहरूको संलग्नता थियो कि थिएन भन्ने कुराको अनुसन्धान गर्ने जिम्मा मेक्सिकन महान्यायाधिवक्ताको कार्यालयलाई दिइएको छ।

डोनाल्ड ट्रम्पको शपथग्रहण अघि सीमाको दुबैतर्फ सुरक्षा व्यवस्था कडा पारिएको छ । ट्रम्पले पदभार ग्रहण गरेपछि अवैध आप्रवासीहरूलाई सामूहिक रूपमा देश निकाला गर्ने घोषणा गरिसकेका छन्।

अनाधिकृत रुपमा अमेरिका छिर्ने आप्रवासीहरूका कारण लामो समयदेखि दुई छिमेकी मुलुकबीचको सम्बन्ध ओझेलमा पर्दै आएको छ। २०२४ को अमेरिकी राष्ट्रपति चुनावमा ट्रम्पले यसलाई पनि एक निर्णायक मुद्दा बनाएर चुनावमा होमिएका थिए।