काठमाडौं । फ्रान्सको एक अदालतले दक्षिणपन्थी नेतृ मरीन ले पेनलाई भ्रष्टाचारको अभियोगमा दोषी ठहर गरेको छ। अदालतले ले पेनलाई चुनाव लड्न पाँच वर्षको प्रतिबन्ध लगाएको छ। यसको अर्थ उनी २०२७ को फ्रान्सेली राष्ट्रपति चुनावमा लड्न सक्ने छैनन्।

मरीन ले पेनलाई युरोपेली संघको कोष हिनामिना गरेको आरोपमा दोषी ठहर गरिएको छ। अदालतले उनलाई चार वर्षको जेल सजाय पनि सुनाएको छ, जसमध्ये दुई वर्ष निलम्बन गरिनेछ र बाँकी दुई वर्ष हिरासतमा नभई इलेक्ट्रोनिक ट्यागको साथ बिताउन सकिन्छ। यद्यपि, ले पेनका वकिलले सजायको विरुद्धमा अपील गर्ने बताएका छन्।

फ्रान्सको एक अदालतले राष्ट्रपति पदका उम्मेदवार मरीन ले पेन र अन्य २० जनालाई फ्रेन्च नेशनल र्‍याली (आरएन) पार्टीको लागि रकम हिनामिना गरेको आरोपमा दोषी ठहर गरेको छ। यी मध्ये, ८ जना त्यतिबेला (हिनामिनाको समय) युरोपियन युनियन सांसद थिए र १२ जना संसदीय सहायक थिए।

न्यायाधीश बेनेडिक्ट डे पर्थुइसले भने: “यो प्रमाणित भएको छ कि यी सबै व्यक्तिहरू वास्तवमा पार्टीको लागि काम गरिरहेका थिए। अनुसन्धानले यो पनि देखाएको छ कि यी प्रशासनिक त्रुटिहरू थिएनन् तर हिनामिना थिए।”