काठमाडौं । अमेरिकी राष्ट्रपति डोनाल्ड ट्रम्पले युरोपेली संघसँग कर सम्बन्धी वार्ताको समयसीमा बढाउन सहमति जनाएका छन्। उनले आफ्नो ट्रुथ सोसल अकाउन्टमा यो जानकारी दिएका छन्।

ट्रम्पले युरोपेली संघसँग कर सम्बन्धी वार्ताको समयसीमा जुलाई ९ सम्म बढाउन सहमत भएको बताएका छन्।

यसअघि युरोपेली आयोगकी अध्यक्ष उर्सुला भोन डेर लेयनले पनि आइतबार ट्रम्पसँग फोनमा कुराकानी भएको जानकारी दिएकी थिइन्।

“राष्ट्रपति ट्रम्पसँग राम्रो कुराकानी भयो। इयु र अमेरिकाको संसारमा सबैभन्दा महत्त्वपूर्ण र घनिष्ठ व्यापारिक सम्बन्ध छ। युरोप वार्तालाई छिटो र निर्णायक रूपमा अगाडि बढाउन तयार छ। राम्रो सम्झौतामा पुग्न हामीलाई जुलाई ९ सम्म चाहिन्छ,” उर्सुला भोन डेर लेयनले एक्समा लेखिन्।

ट्रम्पले ट्रुथ सोसियललाई जानकारी दिए , “आज मलाई युरोपेली आयोगकी अध्यक्ष उर्सुला भोन डेर लेयनबाट फोन आएको छ, जसमा उनले मलाई व्यापार र युरोपेली संघको सम्बन्धमा ५०% ट्यारिफको लागि जुन १ को समयसीमा बढाउन आग्रह गरेकी छिन्। म जुलाई ९, २०२५ सम्मको समयसीमा बढाउन सहमत भएको छु।”

गत महिना, ट्रम्पले अधिकांश इयु सामानहरूमा २०% कर लगाउने घोषणा गरे। पछि, वार्ताको लागि समय दिँदै जुलाई ८ सम्ममा भन्सार दर १०% मा घटाइयो।

यद्यपि, शुक्रबार, ट्रम्पले युरोपेली संघसँगको वार्ताको गतिप्रति निराशा व्यक्त गर्दै ५०% ट्यारिफ लगाउने धम्की दिए, त्यसपछि अब वार्ताको समयसीमा बढाइएको खबर आएको छ।