काठमाडौं । दक्षिण अफ्रिकाको पूर्वी केप प्रान्तका अधिकारीहरूले बाढीमा परी मृत्यु हुनेको संख्या ४९ पुगेको बताएका छन्।

दक्षिण अफ्रिकाको यस भागमा मुसलधारे वर्षाका कारण बाढी आयो। साथै, यसको केही भागहरूमा भारी हिमपात पनि भयो।

मंगलबार बिहान बाढीले एउटा स्कूल बस बगाएको थियो। बसमा धेरै बालबालिका यात्रा गरिरहेका थिए। एक अधिकारीले न्यूजरूम अफ्रिका नामक टिभी च्यानललाई बताएअनुसार बस चालकसहित जम्मा आठ जनाको शव निकालिएको छ।

अन्य अधिकारीहरूले मंगलबार तीन जना विद्यार्थीलाई उद्धार गरिएको बताएका छन्। बसमा कति विद्यार्थी सवार थिए भन्ने अझै स्पष्ट छैन। अन्यलाई खोज्न खोजी कार्य जारी छ।

वर्षा र बाढीका कारण पूर्वी केप प्रान्तका सयौं मानिसहरू विस्थापित भएका छन् र अस्थायी आश्रयस्थलहरूमा बसिरहेका छन्।