काठमाडौं । अमेरिकी राष्ट्रपति डोनाल्ड ट्रम्पले आफ्नो ट्रुथ सोशल ह्यान्डलमा लेखेका छन् – ‘इरान र इजरायलले सम्झौता गर्नुपर्छ र उनीहरूले त्यसो गर्नेछन्।’

उनले दाबी गरे ‘जसरी मैले भारत र पाकिस्तान बीच सम्झौता गराएँ, त्यसरी नै म यी दुई बीच पनि सम्झौता गराउन सक्छु।’

ट्रम्पले लेखे, “मैले भारत र पाकिस्तानको मुद्दामा दुई महान नेताहरू बीचको संवादमा तर्क, सहमति र विवेक ल्याउन अमेरिकी व्यापारको शक्ति प्रयोग गरें। उनीहरूले छिटो निर्णय गरे र उनीहरूले युद्ध रोके।”

ट्रम्पले यसअघि पनि धेरै पटक भारत र पाकिस्तानबीच युद्धविराम गराएको बताएका छन्।

भारत र पाकिस्तानबीचको हालैको द्वन्द्वपछि पाकिस्तानले युद्धविरामको लागि अमेरिकालाई धन्यवाद दिए पनि भारतले अहिलेसम्म यसमा अमेरिकाको प्रत्यक्ष भूमिकाको बारेमा केही भनेको छैन।

त्यसपछि ट्रम्पले केही थप उदाहरणहरू दिए र लेखे – उनले सर्बिया र कोसोभोका साथै इजिप्ट र इथियोपिया बीच तनाव बढ्नबाट रोकेका थिए।

उनले लेखे, “मेरो पहिलो कार्यकालमा, सर्बिया र कोसोभो बीचको दशकौं लामो तनाव युद्धमा परिणत हुन लागेको थियो। तर मैले त्यसलाई रोकें।”

यसपछि ट्रम्पले इजिप्ट र इथियोपियाको उल्लेख गर्दै लेखे – नाइल नदीलाई असर गर्ने बाँधलाई लिएर दुई बीच विवाद थियो।

उनले लेखे, “मेरो हस्तक्षेप पछि अहिले त्यहाँ शान्ति छ।”

ट्रम्पले लेखे, “त्यस्तै गरी, इजरायल र इरानबीच चाँडै शान्ति हुनेछ। धेरै बैठकहरू भइरहेका छन्, फोनमा कुराकानी भइरहेका छन्।”

“म धेरै गर्छु तर मलाई यसको श्रेय मिल्दैन। तर मलाई लाग्छ मानिसहरूले त्यो बुझ्छन्।”