काठमाडौं। विश्वप्रसिद्ध नेपाली पर्वतारोही निर्मल पुर्जा (निम्सदाइ) ले विश्वको सर्वोच्च शिखर सगरमाथा (माउन्ट एभरेष्ट) को सफल आरोहण गरेका छन्। आफ्नै कम्पनी ‘एलाइट एक्स्पेडको एक्सपिडिसन टोलीको नेतृत्व गर्दै उनले आज सगरमाथाको चुचुरोमा पाइला टेकेका हुन्।

यो सफल आरोहणसँगै निम्सदाइको उच्च हिमाली पर्वतारोहणको इतिहासमा अर्को एउटा सुनौलो आयाम थपिएको छ। गत अप्रिल २०२६ मा मात्रै धौलागिरी हिमालको बिना अक्सिजन सफल आरोहण गरेर ८,००० मिटरभन्दा अग्ला हिमालका ५४ वटा ‘वास्तविक चुचुरो’ पुग्ने विश्वकै पहिलो आरोहीको ऐतिहासिक रेकर्ड बनाएका पुर्जाले आफ्नो सोही अपराजित यात्रालाई निरन्तरता दिएका छन्।

‘प्रोजेक्ट पसिबल’ देखि इतिहास रचनेसम्मको यात्रा

निर्मल पुर्जालाई विश्वभर पर्वतारोहणको आधुनिक परिभाषा बदल्ने नायकका रूपमा चिनिन्छ। सन् २०१९ मा उनले सुरु गरेको ‘प्रोजेक्ट पसिबल १४/७’ अन्तर्गत संसारका सबै १४ वटा ८,००० मिटरभन्दा अग्ला हिमालहरू मात्र ६ महिना ६ दिनमा सफलतापूर्वक आरोहण गरेर विश्व कीर्तिमान कायम गरेका थिए। यसअघि यो रेकर्ड झन्डै ७ वर्षभन्दा बढी समयको थियो, जसलाई पुर्जाले ठुलो अन्तरले तोड्दै मानिसको इच्छाशक्ति र दृढताको नयाँ उचाइ स्थापित गरेका थिए।

यद्यपि, उक्त गति को रेकर्ड पछि सन् २०२३ मा नर्वेकी आरोही क्रिस्टिन हारिला र तेन्जेन शेर्पाले ९२ दिनमा पूरा गरेर नयाँ कीर्तिमान बनाए पनि निम्सदाइले विश्व पर्वतारोहण क्षेत्रमा देखाएको बाटो र साहस सधैं अद्वितीय रहनेछ विश्वास गरिएकाे छ।

अन्तर्राष्ट्रिय पहिचान र हिमालप्रतिको समर्पण

भूतपूर्व ब्रिटिस गोर्खा सैनिक समेत रहेका निर्मल पुर्जाले सन् २०२१ मा जाडोयाममा माउन्ट केटुको पहिलो ऐतिहासिक सफल आरोहण गरेर नेपाली पर्वतारोहीहरूको नाम संसारभर चम्काएका थिए। सगरमाथाको प्रख्यात ‘ट्राफिक जाम’ को तस्बिर खिचेर विश्वव्यापी चर्चामा आएका पुर्जाको डकुमेन्ट्री ‘१४ पिक्स: नथिङ इज इम्पसिबल’ नेटफ्लिक्समा निकै रुचाइएको थियो।

८,००० मिटरभन्दा माथिका घातक क्षेत्रहरूमा लगातार नयाँ कीर्तिमान थप्दै अघि बढेका निम्सदाइको यो पछिल्लो आरोहणले विश्वभरका पर्वतारोहण प्रेमीहरूलाई पुनः एकदा उत्साहित बनाएको छ।