रौतहट। आफ्नै श्रीमतीको हत्या गरी फरार रहेका एक व्यक्तिलाई रौतहट प्रहरीले पक्राउ गरेको छ। फतुवा विजयपुर नगरपालिका वडा नम्बर ६ पेटभर्वा टोलका ४२ वर्षीय महन्थ राय यादवलाई प्रहरीले नियन्त्रणमा लिएको हो।

यादवले गत जेठ ३ गते आफ्नै सुत्ने कोठामा ३२ वर्षीया श्रीमती आरती देवी यादवको धारिलो हतियार (बन्चरो) प्रयोग गरी निर्मम हत्या गरेका थिए। घटनापछि उनी फरार भएका थिए।

जिल्ला प्रहरी कार्यालय रौतहट र इलाका प्रहरी कार्यालय लक्ष्मिनिया विजयपुरबाट खटिएको संयुक्त प्रहरी टोलीले प्राविधिक विश्लेषणको आधारमा यादवलाई फतुवा विजयपुर नगरपालिका वडा नम्बर ८ विजयपुरबाट पक्राउ गरेको हो।

पक्राउ परेका यादवमाथि थप अनुसन्धान भइरहेको जिल्ला प्रहरी कार्यालय रौतहटका सूचना अधिकारी एवं प्रहरी नायव उपरीक्षक बसन्त गौतमले जानकारी दिए।