काठमाडौं। भोटेकोशी नदीमा आएको विनाशकारी बाढीका कारण क्षतिग्रस्त माथिल्लो त्रिशूली-३ ‘ए’ जलविद्युत् आयोजनाको सुरुङ (टनेल) भित्रबाट मानिसको आवाज सुनिएको छ।

उद्धारस्थलमा प्राविधिक भूमिकामा खटिनुभएका प्रतिनिधिसभा सदस्य एवम् इन्जिनियर श्रीराम न्यौपानेका अनुसार सुरुङभित्र प्रवेश गरेको नेपाली सेनाको टोलीले भित्रबाट मानिस बोलेको आवाज आएको जानकारी गराएको हो। सुरुङभित्र अड्किएका कामदार तथा प्राविधिकहरूको जीवितै उद्धार हुने यो निकै आशाजनक संकेत भएको उनले बताए।

हाल नेपाली सेना र सशस्त्र प्रहरी बल नेपालको संयुक्त टोली सुरुङभित्र प्रवेश गरी थप अगाडि बढ्दै खोज तथा उद्धार कार्यलाई तीव्र पारिरहेको छ।

इन्जिनियरको हैसियतमा साइटमै रहेर खोज कार्यको नेतृत्व गरिरहेका सांसद न्यौपानेले भने, “हिजो साँझसम्म इन्जिनियरको भूमिकामा साइटमै रहेर उद्धार कार्यमा संलग्न थिएँ। अब सांसदको हैसियतमा हेलिकप्टर प्रयोग नगरी पैदल जनसंवाद गर्दै विदुरसम्म पुग्ने र त्यसपछि गाडीमार्फत काठमाडौं फर्कने तयारीमा छु।”

उनले उद्धारमा दिनरात खटिने नेपाली सेना, सशस्त्र प्रहरी, प्राविधिक टोली र सम्पूर्ण उद्धारकर्मीहरूप्रति हार्दिक सम्मान व्यक्त गर्दै छिट्टै सबैको सकुशल उद्धारको सुखद खबर सुन्न पाइने विश्वास व्यक्त गरेका छन्।