काठमाडौं । इरानी संसद्का सभामुख मोहम्मद बगर घालिबाफले आइतबार इरानविरुद्ध कुनै पनि कदम चाल्नेहरूलाई अब ‘पहिलेभन्दा तीव्र’ र ‘कडा’ जवाफ दिइने बताएका छन्।

उनले ‘सीमित जवाफ’ को समय समाप्त भइसकेको र ‘खेलको नियम बदलिसकेको’ दाबी गरे।

संसद्मा आफ्नो सम्बोधनका क्रममा घालिबाफले भने, “इरानी सैन्य बलका तर्फबाट अमेरिकी अखडामा गरिएका कडा प्रहारपछि अमेरिका र उसका सहयोगी राष्ट्रहरू हताश अवस्थामा पुगेका छन्।”

घालिबाफका अनुसार विरोधी पक्षले केवल खाली शब्द र नाराहरूको सहारा लिँदै युद्धभूमिको काल्पनिक तस्बिर तथा भिडियोहरू सिर्जना गर्न आर्टिफिसियल इन्टेलिजेन्स (AI) को प्रयोग गरिरहेको छ।

अमेरिकाले ‘सीमित जवाफ’ को युग समाप्त भइसकेको कुरा बुझ्नुपर्ने भन्दै घालिबाफले हालैका सैन्य अभियानमा गरिएका इरानी आक्रमणहरू केवल सुरुआत मात्र भएको बताए।

उनले चेतावनी दिँदै भने, “यदि अमेरिकाले अझै पनि परिस्थितिलाई बुझ्न सकेको छैन भने, धेरै ढिलो हुनुअघि उसले खेलको नियम बदलिसकेको कुरा बुझ्न आवश्यक छ।”

मोहम्मद बगर घालिबाफले इरानको भावी जवाफी कारबाही अझ तीव्र हुने दाबीसमेत गरे।

उल्लेखनीय छ कि शनिबार अमेरिका र इरानले समुद्री जहाजहरूमा एक-अर्काविरुद्ध जवाफी प्रहार गरेका थिए। करिब एक महिनासम्म सामान्यतया शान्त रहेको स्थितिपछि एक हप्ताअघि सुरु भएको द्वन्द्वको यो पछिल्लो शृङ्खला हो।