नयाँदिल्ली।  भारतको नयाँदिल्लीस्थित सत्य निकेतनमा एक पाँचतले भवन भत्किँदा छ जनाको मृत्यु भएको छ। दिल्ली विश्वविद्यालय परिसरनजिकै रहेको विद्यार्थी आवास क्षेत्रको सो भवन आइतबार भत्किएको हो।

घटनापछि प्रहरी, अग्नि नियन्त्रक र विपद् प्रतिकार्य टोलीले अर्थमुभर तथा स्निफर कुकुरको सहयोगमा दोस्रो दिन पनि उद्धार कार्य जारी राखेका छन्।

मुख्यमन्त्री रेखा गुप्ताका अनुसार हालसम्म १२ जनाको उद्धार गरिएको छ भने छ जना घाइते भएका छन्। भग्नावशेषको करिब ८० प्रतिशत भाग हटाइसकिएको छ।

करिब ५५ वर्ष पुरानो उक्त भवनमा मर्मतसम्भारको काम भइरहेको थियो। बेसमेन्टमा पानी जम्नुका साथै मर्मतका क्रममा संरचना कमजोर भएकाले भवन भत्किएको प्रारम्भिक अनुसन्धानले देखाएको छ।

यस घटनापछि दिल्ली सरकारले विद्यार्थी आवास, विद्यालय र नर्सिङ होम जस्ता सार्वजनिक भवनहरूमा नियमित संरचनात्मक परीक्षण र सुरक्षा प्रमाणपत्र अनिवार्य गर्ने तयारी थालेको छ।