काठमाडौं । बेलायतको वेल्सस्थित ऐतिहासिक कार्डिफ क्यासल (दरबार) मा पाकिस्तानको राष्ट्रिय झण्डा फहराइएको विषयलाई लिएर राजनीतिक विवाद उत्पन्न भएको छ। दक्षिणपन्थी दल ‘रिफर्म युके’ ले यस कदमको कडा विरोध गरेको छ।

बिबिसीको प्रतिवेदन अनुसार रिफर्मका वरिष्ठ नेता रोबर्ट जेनरिकले कार्डिफ क्यासलमा पाकिस्तानी झण्डा फहराइएको भिडियो सामाजिक सञ्जालमा सेयर गरेका थिए। उनले बेलायतका ऐतिहासिक संरचनाहरूमा विदेशी झण्डा फहराउने कार्य तत्काल बन्द गरिनुपर्ने बताएका छन्।

यसैबीच कार्डिफ काउन्सिलका लेबर नेता क्रिस विभरले भने गत अगस्ट १४ मा पाकिस्तानको स्वतन्त्रता दिवसका अवसरमा कार्डिफमा बसोबास गर्दै आएका पाकिस्तानी समुदायको योगदानको सम्मानस्वरूप झण्डा फहराइएको स्पष्ट पारेका छन्।

क्रिस विभरका अनुसार अगस्ट १५ मा भारतको स्वतन्त्रता दिवसका अवसरमा सोही स्थानमा भारतीय झण्डा पनि फहराइएको थियो। काउन्सिलका अनुसार अगस्ट ९ मा आयोजित एक कार्यक्रमका क्रममा पनि पाकिस्तानी झण्डा फहराइएको र त्यो रातभरि राखिएको थियो।

वेल्श कन्जरभेटिभ सांसद नताशा असगरले रिफर्म युकेको विरोधको आलोचना गर्दै आफू पाकिस्तानी, भारतीय र पोलिस समुदायका झण्डा फहराउने कार्यक्रमहरूमा सहभागी भइसकेको बताइन्। उनले यस्ता कार्यक्रमहरू कुनै समुदायको कब्जा नभई एक-अर्काप्रति सम्मान प्रकट गर्ने माध्यम भएको उल्लेख गरिन्।

बेलायतको राजनीतिमा करिब १०० वर्षदेखि लेबर र कन्जरभेटिभ पार्टीको वर्चस्व रहँदै आएको छ। तर नाइजेल फराजको दक्षिणपन्थी दल ‘रिफर्म युके’ ले यो राजनीतिक परिदृश्यलाई बदल्दै लगेको देखिन्छ। विभिन्न सर्वेक्षणहरूमा यस पार्टीलाई करिब ३५ प्रतिशत जनताको समर्थन प्राप्त भइरहेको र अन्य परम्परागत दलहरूभन्दा अगाडि देखिएको छ।

रिफर्म युकेको पकड अब इङ्गल्यान्डमा मात्र सीमित छैन; वेल्स र स्कटल्यान्डमा पनि यसको जनाधार तीव्र रूपमा बढिरहेको छ।

पार्टीको बढ्दो लोकप्रियताको मुख्य कारण आप्रवासन (इमिग्रेसन) र महङ्गी हुन्। फराजले साना डुङ्गाहरूमार्फत ‘इंग्लिस च्यानल’ पार गरेर बेलायत प्रवेश गर्ने र शरण माग्ने मानिसहरूको मुद्दालाई निरन्तर उठाउँदै आएका छन्। ठूला दलहरू आप्रवासन नियन्त्रण गर्न पूर्ण रूपमा असफल भएको रिफर्म युकेको आरोप छ।

यसको सबैभन्दा ठूलो घाटा कन्जरभेटिभ पार्टीलाई भइरहेको छ, जुन लामो समयदेखि बेलायतको मुख्य दक्षिणपन्थी दल रहँदै आएको थियो। तर सन् २०२४ को निर्वाचनमा नराम्रो पराजय व्यहोर्दै सत्ताबाट बाहिरिएपछि उसका धेरै परम्परागत मतदाताहरू रिफर्म युकेतर्फ आकर्षित भएका छन्।

सन् २०२४ को आम निर्वाचनमा रिफर्म युकेले १४.३ प्रतिशत मत प्राप्त गर्दै ५ सिट जितेको थियो। तर सन् २०२६ को स्थानीय निर्वाचनमा भने पार्टीको प्रदर्शन निकै मजबुत रह्यो। इङ्गल्यान्डमा रिफर्म युकेले १,४५४ काउन्सिल सिट जित्नुका साथै १४ वटा काउन्सिलहरूमा स्पष्ट बहुमत हासिल गर्‍यो। यसको तुलनामा कन्जरभेटिभ पार्टीले केवल ८०१ सिट मात्र जित्न सक्यो।

यसले कन्जरभेटिभका परम्परागत मतदाताहरूको ठूलो हिस्सा अब रिफर्म युकेतर्फ ढल्किसकेको सङ्केत गर्दछ। अब फराजको पार्टीले कन्जरभेटिभसँग असन्तुष्ट रहेकाहरूसँगै लेबर पार्टीबाट निराश बनेका मतदाताहरूलाई पनि आफूतिर आकर्षित गर्ने रणनीति बनाएको छ।