लन्डन । बेलायतको हवाई यातायात सेवामा देखिएको गम्भीर प्राविधिक समस्याका कारण मंगलबार देशभर एक हजारभन्दा बढी उडान रद्द भएका छन्।

बेलायतको राष्ट्रिय हवाई यातायात सेवा संस्थाले मंगलबार दिउँसो आफ्नो उडान व्यवस्थापन प्रणालीमा प्राविधिक अवरोध उत्पन्न भएको जनाएको थियो।

उक्त समस्याका कारण देशभरका विमानस्थलहरूबाट हुने उडान सञ्चालन प्रभावित भई ठुलो सङ्ख्यामा उडानहरू ढिला हुनुका साथै रद्द गर्नुपरेको थियो।

प्राविधिक गडबडीको प्रत्यक्ष प्रभाव बेलायतका प्रमुख विमानस्थलहरूमा परेको छ। लन्डनको हिथ्रो, एडिनबर्ग र म्यानचेस्टरलगायतका प्रमुख विमानस्थलमा उडान तालिकाहरू अस्तव्यस्त बनेको उडान अनुगमनसम्बन्धी तथ्यांकले देखाएको छ।

स्थानीय सञ्चारमाध्यमहरूले तथ्यांक विश्लेषण गर्दै मंगलबार रातिसम्म बेलायतका विभिन्न विमानस्थलबाट एक हजारभन्दा बढी उडान रद्द भएको पुष्टि गरेका छन्।

राष्ट्रिय हवाई यातायात सेवा संस्थाका अनुसार प्रणालीमा देखिएको प्राविधिक समस्या सुधार गरी पूर्ण रूपमा समाधान भइसकेको छ र हवाई सेवा सामान्य अवस्थामा फर्किएको छ।

यद्यपि, रद्द तथा ढिला भएका उडानहरूको अत्यधिक चाप व्यवस्थापन गर्न सोचेभन्दा बढी समय लागिरहेको र परिस्थिति सामान्य बनाउन अधिकतम प्रयास भइरहेको संस्थाले विज्ञप्तिमार्फत जनाएको छ।

अचानक उडानहरू रद्द र ढिला भएपछि हजारौँ यात्रुहरू प्रभावित भएका छन् भने विमानस्थलहरूमा यात्रुको बाक्लो भीड र उडान पुनःतालिकीकरणको तीव्र चाप बढेको छ।