काठमाडौं। नवउद्यमीहरूलाई लगानी र व्यावसायिक मार्गदर्शन जुटाउने प्लेटफर्म ‘शार्क ट्यांक नेपाल’को दोस्रो सिजनमा ६० करोड १२ लाख रुपैयाँ बराबरको लगानी सम्झौता भएको छ।

आयोजकका अनुसार दोस्रो सिजनको छायांकन पूर्ण रूपमा सम्पन्न भइसकेको छ। कुल १० सातासम्म प्रसारण हुने यो सिजन आगामी दशैंलगत्तै दर्शकमाझ ल्याउने तयारी गरिएको छ, यद्यपि प्रसारणको अन्तिम र निश्चित मिति भने तय हुन बाँकी छ। कार्यक्रम सातामा दुई दिन (हप्ताको दुई एपिसोड) राति ८ बजे हिमालय टेलिभिजन एचडीबाट प्रसारण हुनेछ।

दोस्रो सिजनमा कुल ६० देखि ६५ जना ‘पिचर’ (व्यवसायिक अवधारणा प्रस्तुत गर्ने उद्यमी) हरूको सहभागिता रहेको छ। पहिलो सिजनको तुलनामा यसपटक सहभागी व्यवसायहरूको आकार (स्केल) ६० देखि ६५ प्रतिशतले वृद्धि भएको आयोजकको दाबी छ।

यस सिजनमा पनि पहिलो सिजनकै पाँचै जना ‘शार्क’ हरू- हेमराज ढकाल, आनन्द बगरिया, ऋतुसिंह वैद्य, सौरभ ज्योति र क्याबिनेट श्रेष्ठको निरन्तरता रहेको छ।

आयोजकका अनुसार दोस्रो सिजनमा विशेष गरी प्रविधि, खाद्य तथा पेय पदार्थ र कृषिजन्य व्यवसायमा उद्यमीहरूको उच्च रुचि र सहभागिता देखिएको छ। प्रस्तुत गरिएका केही व्यवसायहरूमा अन्तर्राष्ट्रिय बजारमा समेत विस्तार हुन सक्ने प्रचुर सम्भावना रहेको शार्कहरूले बताएका छन्।

पहिलो सिजनको तुलनामा यसपटकका व्यावसायिक प्रस्तावहरू बढी परिपक्व, व्यावहारिक र प्रमाणित रहेका तथा कार्यक्रमले साना सहरका उद्यमीहरूलाई पनि लगानी खोज्न र व्यवसाय विस्तार गर्न प्रेरित गरेको आयोजकको भनाइ छ।