काठमाडौं। सञ्चार तथा सूचना प्रविधिमन्त्री डा. विक्रम तिमिल्सिनाले देशको प्रमुख पुँजीका रूपमा रहेका युवाहरूलाई उद्यमशीलता र नवप्रवर्तनमा जोड्न सरकारले अनुकूल वातावरण निर्माण गरिरहेको बताएका छन्।

शुक्रबार नेपाल बिजनेस इन्स्टिच्युट र बैंक तथा वित्तीय संस्था परिसंघ नेपाल (सिबिफिन) द्वारा आयोजित पाँचौँ संस्करणको ‘नेपाल युवा उद्यमशीलता सम्मेलन २०२६’ लाई सम्बोधन गर्दै मन्त्री तिमिल्सिनाले युवाको ज्ञान, सीप, सिर्जनशीलता र प्रविधिको उपयोगबाट नै मुलुकको आर्थिक समृद्धि हासिल गर्न सकिने स्पष्ट पारे।

“कुनै पनि देशको सबैभन्दा ठूलो शक्ति र पुँजी भनेको युवा जनशक्ति हो,” मन्त्री तिमिल्सिनाले भने, “अनुसन्धान र नवप्रवर्तनमा लगानी नगरी युवालाई स्वदेशमै आफ्ना सपना पूरा गर्न र आर्थिक समुन्नति हासिल गर्न सकिँदैन। त्यसका लागि सरकारले आवश्यक वातावरण बनाउने र निजी क्षेत्रले त्यसमा साथ दिनुपर्छ।”

सूचना प्रविधिको माध्यमबाट नेपालमै बसेर विश्व बजारमा सेवा प्रदान गर्न सकिने उल्लेख गर्दै मन्त्री तिमिल्सिनाले युवा जनशक्तिलाई वैदेशिक रोजगारीमा मात्र निर्भर नराखी स्वदेशमै अवसर सिर्जना गर्नुपर्नेमा जोड दिए।

“अब हामीले श्रम र जनशक्ति होइन, सेवा बेच्ने दिशामा अघि बढ्नुपर्छ,” उनले भने, “सूचना प्रविधिको माध्यमबाट नेपालमै बसेर विश्वभर सेवा दिन सकिन्छ। यसले युवाका लागि स्वदेशमै अवसर सिर्जना गर्नुका साथै मुलुकको अर्थतन्त्रमा समेत ठूलो योगदान पुर्‍याउँछ।”

नेपालमा सूचना प्रविधिको क्षेत्रमा नयाँ जनशक्ति र विज्ञहरू विकास हुँदै गएकाले यसको सही उपयोग आर्थिक रूपान्तरणका लागि गर्नुपर्ने मन्त्रीको भनाइ थियो। त्यसका लागि सरकार, निजी क्षेत्र, शैक्षिक संस्था र अन्य सरोकारवाला निकायबिच बलियो समन्वय तथा सहकार्य आवश्यक रहेको उनले बताए।

सूचना प्रविधिको सम्भावना उपयोग गर्न डिजिटल विभाजन अन्त्य गर्ने, इन्टरनेटको पहुँच विस्तार गर्ने र सेवाको गुणस्तर सुधार गर्ने कामलाई सरकारले प्राथमिकता दिएको मन्त्री तिमिल्सिनाले जानकारी दिए। साथै दूरसञ्चार क्षेत्रमा उल्लेखनीय प्रगति हासिल गर्ने लक्ष्यसहित सरकारले यसै वर्ष फाइभ-जी सेवा सुरु गर्ने गरी काम गरिरहेको उनले बताए।

प्रविधिले काम गर्ने तरिका परिवर्तन गर्न सक्ने भए पनि यसले मानिसको महत्त्व घटाउने नभई क्षमता अभिवृद्धि गर्ने माध्यमका रूपमा काम गर्ने धारणा उनले राखे।

सरकारले नीति निर्माणमा मात्र सीमित नभई त्यसको प्रभावकारी कार्यान्वयनमार्फत नागरिक र उद्यमीले प्रत्यक्ष लाभ प्राप्त गर्ने वातावरण बनाउने प्रतिबद्धता व्यक्त गरे। बदलिँदो श्रम बजारअनुसार युवालाई भविष्यमा आवश्यक पर्ने सीप र क्षमतामा आधारित शिक्षा प्रदान गर्दै बजारको मागअनुसार दक्ष जनशक्ति उत्पादन गर्नुपर्नेमा मन्त्री तिमिल्सिनाले जोड दिए।

कार्यक्रममा राष्ट्रिय योजना आयोगका सदस्य डा. सुदन झाले कृत्रिम बौद्धिकता (एआई) का क्षेत्रमा नेपालको अवस्था सुधार हुँदै गए पनि अझै कमजोर नै रहेको बताए।

एआई र उद्यमशीलताका क्षेत्रमा नेपाली युवाको सहभागिता बढ्दै गएको तथा सूचना प्रविधिमा लगानी विस्तार भइरहेको उल्लेख गर्दै डा. झाले यस अवसरको उपयोग गर्न सरकारले एआईसम्बन्धी नीतिको प्रभावकारी कार्यान्वयनलाई प्राथमिकता दिएको जानकारी दिए।

एआईको उपयोगबाट सरकारी सेवा प्रवाह प्रभावकारी बनाउन, तथ्यांकको सुरक्षा सुनिश्चित गर्न, नयाँ रोजगारीका अवसर सिर्जना गर्न तथा उत्पादन र उत्पादकत्व वृद्धि गर्न सकिने बताउँदै उनले प्रविधिको सही उपयोगले नेपालको अर्थतन्त्रलाई थप प्रतिस्पर्धी बनाउन सहयोग पुग्ने विश्वास व्यक्त गरे।