जेनेभा। विश्व स्वास्थ्य संगठनले चीनको वुहानथित पशुपन्छी थोक बजार बन्द गर्नु उचित नहुने बताएको छ । यद्यपि संगठनले कोरोनाभाइरस फैलाउन यो बजारको भूमिका रहेको भने स्वीकार गरेको छ । उसले यो बजार या त भाइरसको स्रोतको रुपमा रहेको वा यसले भाइरसको प्रसार बढाउने काम गरेको स्वीकार गरेको छ । डब्लुएचओले यस विषयमा अझै धेरै शोध र अध्ययनको आवश्यकता रहेको भनेको छ ।

चीनका अधिकारीहरुले जनवरीमा यो बजारलाई बन्द गराएका थिए । त्यसपछि वन्य जीवजन्तु र समुद्री जीवजन्तुको खपत तथा व्यापारमा अस्थायी रोक लागेको थियो । खाद्य सुरक्षासँग सम्बन्धित डब्लुएचओका एक विशेषज्ञ डा. पिटर बेल इम्बारेकले भने ‘यो प्रस्ट छ कि यो बजारका कारण कोरोनाभाइरसको प्रकोप बढ्यो । तर, यो भूमिका कस्तो किसिमको थियो ? यस विषयमा थप प्रस्ट हुनु जरुरी छ ।’

कोरोनाभाइरस कसरी आयो र यति गम्भीर कसरी भयो भन्ने विषयमा अहिले चीन र अमेरिका आमनेसामने छन् । अमेरिकी राष्ट्रपति डोनाल्ड ट्रम्प र विदेशमन्त्री माइक पोम्पियोले भाइरस संक्रमण फैलाउन चीन जिम्मेवार भएको आरोप पटक पटक लगाइरहेका छन् । पोम्पियोले त यो भाइरस चीनको प्रयोगशालामा बनेको र यसको प्रमाण आफूहरुसँग भएको दावी समेत गरिसकेका छन् ।

विशेषज्ञ बेन इम्बारेकले भने यी आरोपका बारे केही भनेनन् । उनले अगाडि भने ‘मर्सको स्रोत ऊँट हो भन्ने थाहा पाउन एक वर्षको समय लागेको थियो । कोरोनाको हकमा पनि अहिले ढिलो भइसकेको छैन । हाम्रो लागि अहिले सबैभन्दा जरुरी यो भाइरस फैलिनबाट रोक्नु हो ।’ डब्लुएचओले यो भाइरसको स्रोत मानिएको वन्य जीवको बजारलाई बन्द गर्ने विचारको समर्थन भने गरेको छैन ।

डा. बेन इम्बारेकका अनुसार यस्ता जीवित पशुपन्छीको बजार पूरै विश्वमा भोजन र लाखौं करोडौं मानिसहरुको आजीविकाको लागि आवश्यक छ । त्यसैले अधिकारीहरुले यसलाई बन्द गर्नु भन्दा यसको स्तर सुधार गर्नेतर्फ आफ्नो ध्यान केन्द्रित गर्नुपर्छ ।