काठमाडौं। विश्व क्रिकेटमा सबैभन्दा सफल कप्तानहरुमध्येका एक भारतका पूर्वकप्तान महेन्द्र सिंह धोनीले अन्तर्राष्ट्रिय क्रिकेटबाट सन्यासको घोषणा गरेका छन् । २३ डिसेम्बर २००४ मा बंगलादेशविरुद्ध एकदिवसीय क्रिकेट खेल्दै धोनीले अन्तर्राष्ट्रिय करिअर सुरु गरेका थिए । उनले अन्तिम खेल २०१९ मा एकदिवसीय विश्वकपमा न्यूजिल्याण्डविरुद्ध सेमिफाइनल खेले । धोनीको १५ वर्ष लामो करिअरमा उनले कप्तानको रुपमा आइसीसीका सबै ठूला अन्तर्राष्ट्रिय प्रतियोगिताको उपाधि जिते ।

धोनीको करिअरमा उनको डेब्यू खेल र अन्तिम खेलमा अद्भूत संयोग परेको छ । धोनी पहिलो खेलमा शून्यमै आउट भएका थिए । बंगलादेशविरुद्ध उसकै घरेलु मैदान चट्टोग्राममा खेलेका धोनीलाई पहिलो बलमै बंगलादेशका बलर मोहम्मद रफिकको बलमा तपेश वैश्य र विकेटकिपर खालिद मसूदको हातबाट रनआउट भएका थिए । रोचक रुपमा धोनी आफ्नो करिअरको अन्तिम अन्तर्राष्ट्रिय खेलमा पनि रनआउट नै भए ।

गतवर्ष जुलाइ ९ मा म्यान्चेस्टरमा न्यूजिल्याण्डविरुद्ध विश्वकपको सेमिफाइनलमा धोनी लोकी फर्ग्युसनको बलमा मार्टिन गप्टिलको हातबाट रनआउट भए । यो खेल नै उनको करिअरको अन्तिम खेल बन्न पुग्यो । विकेटकिपर ब्याट्सम्यान धोनी रनआउन गराउन निकै खप्पिस थिए । धोनीलाई रनआउट, स्टम्पिङ र डिआरएसका विशेषज्ञ नै मानिन्थ्यो । तर, रोचक रुपमा धोनी आफ्नो पहिलो र अन्तिम खेलमा त्यसैको शिकार भए जसका उनी विशेषज्ञ थिए ।