काठमाडौं। अमेरिकी सेनाले विकास गरेको ‘मून शट’ भनिएको कोभिड–१९ विरुद्धको खोपको क्लिनिकल ट्रायलको नतिजा केही दिनमै आउने एक विज्ञले बताएका छन् । एक डोज मात्र लगाए पुग्ने र कोरोनाभाइरसका सबै भेरिएन्टविरुद्ध काम गर्ने यो खोपको प्रारम्भिक नतिजा ‘उत्साहजनक’ भएको प्रोफेसर ल्युक ओनिलले बताएका छन् ।

ट्रिनिटी कलेज डब्लिनमा बायोकेमेस्ट्रीका प्राध्यापक ओनिलका अनुसार खोपको मानिसमा गरिएको पहिलो फेजको क्लिनिकल ट्रायलको नतिजा केही दिनमै सार्वजनिक गरिनेछ । बिहीबार प्रोफेसर ओनिलले न्युजटकसँग कुरा गर्दै भनेका छन् ‘यो मुन शट हो ।’ उनले यो युनिभर्सल भ्याक्सिन भएको र यसले कोरोनाभाइरसका भविष्यमा आउन सक्ने कुनै पनि भेरिएन्टविरुद्ध समेत काम गर्ने बताए ।

प्रोफेसर ओनिलका अनुसार यो खोपको परीक्षण सुरुमा जनावरमा गरिएको थियो । बाँदरमा गरिएको परीक्षणमा यो खोपले २००२ मा आएको सुरुवाती कोरोनाभाइरस सार्सदेखि २०१९ मा आएको सार्स कोभ २, अल्फा, बिटा, डेल्टा, ओमिक्रोन लगायत सबै भेरिएन्टबाट प्रतिरक्षा गरेको पाइएको थियो । अहिले वैज्ञानिकहरु यसको मानिसमा गरिएको ट्रायलको मध्यमा रहेको बताउँदै उनले केही दिनमै मानिसमा गरिएको फेज १ ट्रायलको नतिजा आउने बताए ।