काठमाडौं । पोल्याण्डका लागि रुसी राजदूत सर्गेई एन्ड्रिभलाई रूसको विजय दिवसको वार्षिकोत्सवमा रातो पेन्ट लगाएर प्रदर्शनकारीहरूले आक्रमण गरेका छन्।

एन्ड्रिभ वार्सामा सोभियत सैनिकहरूको सैन्य स्मारकमा फूल चढाउन गएका थिए जब प्रदर्शनकारीहरूले उनीमाथि रातो पेन्ट हाने।

रुसको आधिकारिक समाचार एजेन्सी तासले यो जानकारी दिएको हो । उनीमाथि भएको यो आक्रमणको भिडियो सामाजिक सञ्जालमा निकै भाइरल भइरहेको छ ।

भिडियोमा उनलाई प्रदर्शनकारीको भीडले घेरेको देखिन्छ र एक प्रदर्शनकारीले उनलाई निकै नजिकबाट रातो पेन्ट फालेका छन् । तर एन्ड्रिव उत्तेजित नभई अझै उभिन्छन्, उनले आफ्नो अनुहार सफा गर्छन् तर प्रदर्शनकारीहरूलाई प्रतिक्रिया दिँदैनन्।

समाचार एजेन्सी तासका अनुसार, “रुसी संघका राजदूत, उनकी पत्नी र उनीहरूसँगै आएका कूटनीतिज्ञहरूको समूहलाई रातो रंगले आक्रमण गरिएको थियो र उनीहरूलाई सैन्य स्मारकमा प्रवेश गर्न पनि दिइएन।”

“कारबाट बाहिर निस्कने बित्तिकै एन्ड्रिभलाई आक्रामक प्रदर्शनकारीहरूले घेरेका थिए। यी प्रदर्शनकारीहरूले सैन्य स्मारकमा युक्रेनी झण्डासहित रुस विरोधी नारा लगाएका थिए।”

यसपछि प्रहरीले कूटनीतिज्ञहरूलाई आफ्नो कारसम्म सकुशल पुग्न मद्दत गरेको थियो । दोस्रो विश्वयुद्धमा नाजी जर्मनीमाथिको विजयको सम्झनामा रूसले मे ९ मा विजय दिवस मनाउँछ।

विजय दिवसको अवसरमा रुसी राष्ट्रपति भ्लादिमिर पुटिनले एक सम्बोधनमा रुस युक्रेनमा मातृभूमिका लागि लडिरहेको बताए ।

यस वर्षको फेब्रुअरीमा रुसले युक्रेनमा आक्रमण गरेपछि दुई देशबीच युद्ध जारी छ । पोल्याण्डको राजधानीमा युक्रेनको समर्थन र यस युद्धको विरोधमा जनताले प्रदर्शन गरेका थिए ।