काठमाडौं । रुसी राष्ट्रपति भ्लादिमिर पुटिनले विजय दिवसको अवसरमा आफ्नो सम्बोधनमा रुस युक्रेनमा आफ्नो मातृभूमिका लागि लडिरहेको बताएका छन् ।

दोस्रो विश्वयुद्धमा नाजी जर्मनीमाथिको विजयको सम्झनामा मनाइने विजय दिवसमा आफ्नो वार्षिक सम्बोधनमा पुटिनले रुसी सैनिकहरू युक्रेनमा आफ्नो मातृभूमिको भविष्यका लागि लडिरहेको बताए।

राष्ट्रपति पुटिनले विजय दिवसको अवसरमा ठूलो घोषणा गर्न सक्ने खबर आए पनि उनको भाषणको केन्द्रविन्दु युक्रेनमा रुसले गरेको आक्रमणको रक्षामा बढी केन्द्रित थियो ।

उनले युक्रेनसँगको युद्धलाई सन् १९४५ मा भएको विजयसँग तुलना गरे । रुसको सुरक्षा माग अस्वीकार गरेकोमा पुटिनले पश्चिमी देश र नेटोलाई दोष दिएका छन् ।

युक्रेनमा रुसले गरेको आक्रमणको दश साता बितिसक्दा पनि युद्धमा सर्वसाधारण मारिनेको संख्या बढ्दै गएको छ ।

पूर्वी युक्रेनी सहर बिलोहोरिभकाको एक विद्यालय भवनमा रुसी आक्रमणमा परी कम्तीमा ६० जनाको मृत्यु भएको आशंका गरिएको छ । बम विष्फोटबाट बच्न मानिसहरूले यस भवनमा शरण लिएका थिए।

उच्च सैन्य अधिकारीहरूको उपस्थितिमा, पुटिनले युक्रेनी जनतालाई फासिस्ट भने।

राष्ट्रपति पुटिनले फेरि एक पटक किभको निर्वाचित सरकार नव-नाजी जनताद्वारा चलिरहेको दाबी दोहोर्याए।

“मातृभूमिको पवित्रता” को रक्षा गर्दै, पुटिनले पूर्वी क्षेत्रको कुरा उल्लेख गरे। अनिले रुसी आक्रमणको सबै जोड युक्रेनको यही क्षेत्रमा छ ।

“आज तपाईं डोनबासमा हाम्रा जनताको लागि, रूस र हाम्रो देशको सुरक्षाको लागि लड्दै हुनुहुन्छ,” उनले भने।

राष्ट्रपति पुटिनले नेटो र युक्रेनविरुद्ध पनि यस्ता आरोप लगाएका छन्, जुन तथ्यले पुष्टि गर्दैन।

उनले भने, “उनीहरूले हाम्रो ऐतिहासिक भूमिमा घुसपैठ गर्न डोनबासमा हामीविरुद्ध कारबाही गर्ने योजना बनाएका छन्। र यो हामी र हाम्रो सिमानाका लागि खतरा बनेको छ।”

राष्ट्रपति पुटिनको भाषण ११ मिनेटको थियो।

यस विजय दिवसको परेडमा ११ हजार सैनिक र १ सय ३१ हतियारधारी सवारी साधनले भाग लिएको रूसी समाचार एजेन्सीहरूले बताएका छन्। यसमा रुसको अर्माटा ट्याङ्कहरू पनि समावेश थिए।

युक्रेनमा जारी लडाइँका लागि अर्माटा ट्याङ्कहरू पूर्ण रूपमा तयार नभएको विश्वास गरिएको थियो।

विजय दिवसको अवसरमा रूसका सहरहरूमा पनि यस्तै परेडहरू सानो मात्रामा आयोजना गर्ने योजना थियो।

तर सबै योजना अनुसार हुन सकेन । ‘खराब मौसम’का कारण परेड हुनुअघि वायुसेनाको एउटा शो रद्द गरिएको क्रेमलिनले जनाएको छ।

विजय दिवस अघि, रूसी लडाकु जेटहरूले रेड स्क्वायरमा एयर शोको लागि पूर्वाभ्यास गरे। उनीहरूले जेड आकार हावामा डिजाइन गर्न लागेका थिए।