काठमाडौं । पाकिस्तानका प्रधानमन्त्री शाहबाज शरीफले एक अन्तर्वार्तामा भारतसँग तीनवटा युद्ध लडेपछि पाकिस्तानले पाठ सिकेको बताएका छन् । शाहबाज सरिफले आफू प्रधानमन्त्री मोदीसँग शान्तिपूर्ण ढंगले वार्ता गर्ने पक्षमा रहेको बताए ।

शाहबाज सरिफले यो अन्तर्वार्ता युएई भ्रमणका क्रममा अल-अरेबिया टिभीलाई दिएका थिए, जसलाई पाकिस्तान मुस्लिम लिग (नवाज) अर्थात् पीएमएल-एनले आफ्नो सामाजिक सञ्जाल ह्यान्डल मार्फत सेयर गरेको छ।

शाहबाज शरीफले यस क्रममा भने, “भारत हाम्रो छिमेकी देश हो र स्पष्ट रूपमा भन्नुपर्दा, हामी छनोटका छिमेकी होइनौं, तर हामीले सधैं सँगै बस्नुपर्दछ। कसरी शान्तिपूर्वक बाँच्ने यो हामीमा निर्भर छ। पाकिस्तानले यसको पाठ सिकेको छ। हामीले भारतसँग तीनवटा युद्ध लडेका थियौं।”

“यसले युद्ध र दुःख, बेरोजगारी, गरिबी ल्यायो। लाखौं मानिसहरूमा असन्तुष्टिको भावना बढ्यो। हामी हाम्रा वास्तविक समस्याहरू समाधान गर्दै भारतसँग शान्तिपूर्वक बाँच्न चाहन्छौं।”

وزیراعظم شہباز شریف کا العربیہ ٹی وی کے ساتھ خصوصی انٹرویو۔۔۔ https://t.co/Cm5BOeQSJr

— PML(N) (@pmln_org) January 16, 2023

प्रधानमन्त्री मोदी र भारतलाई सन्देश दिँदै शाहबाज शरीफले भने, “हामीहरूबीच कश्मीर जस्ता ज्वलन्त मुद्दाहरू समाधान गर्न बसेर गम्भीर वार्ता गरौं।”

शाहबाज सरिफले भारत प्रशासित कश्मीरमा हरेक दिन मानवअधिकार उल्लङ्घन भइरहेको आरोप पनि लगाएका छन् । अगस्ट २०१९ मा, कश्मीरीहरूलाई विशेष सुविधा दिने धारा ३७० हटाइयो। शरीफले भने कि यो सबै बन्द हुनुपर्छ।

पाकिस्तानी प्रधानमन्त्रीले भने, “हामी हाम्रो स्रोत बम र हतियार बनाउनमा खेर जान दिन चाहँदैनौं। हामी त्यसलाई देशलाई समृद्ध बनाउन प्रयोग गर्न चाहन्छौं। म मोदीलाई यो सन्देश दिन चाहन्छु।”

पाकिस्तानलाई प्राप्त आर्थिक सहयोगको बारेमा शाहबाज शरीफले भने, “पाकिस्तानको दृष्टिकोणबाट हेर्दा यो राम्रो देखिँदैन कि उसले सधैं मद्दतको लागि अनुरोध गरिरहन्छ। छिमेकी राष्ट्रहरूले दाजुभाइको रूपमा हामीलाई सहयोग गरिरहेका छन्, तर हामी यसलाई व्यापार र लगानीमा परिणत गर्न चाहन्छौं। आफ्नो खुट्टामा उभिएर, हामी आफ्नो आय बढाउन चाहन्छौं।