काठमाडौं । ग्रीसमा मंगलबार भएको रेल दुर्घटनामा ५७ जनाको मृत्यु भएपछि भएको विरोध प्रदर्शनमा हिंसा भड्किएको छ ।

राजधानी एथेन्समा प्रदर्शनकारीसँग हडतालमा रहेका हजारौं रेलवे कर्मचारी पनि सामेल भएका छन्।

प्रदर्शनकारी र प्रहरीबीच हिंसात्मक झडप भएको खबर छ । केही प्रदर्शनकारीले प्रहरीमाथि पेट्रोल बम समेत प्रहार गरेका छन् । प्रहरीले अश्रुग्यास र स्टन ग्रेनेड प्रयोग गरेको छ ।

ग्रीसको लारिसा नजिकै यात्रुवाहक रेल र मालबाहक रेलबीच ठक्कर भएको थियो । त्यसयता देशका विभिन्न भागमा सरकारविरुद्ध प्रदर्शन भइरहेका छन् ।

रेलको निजीकरण र रेलवे कोषमा कटौतीप्रति पनि जनता आक्रोशित छन् । ग्रीसका प्रधानमन्त्रीले दुर्घटनामा ज्यान गुमाउनेका परिवारसँग माफी मागेका छन् ।

प्रधानमन्त्री किरियाकोस मित्सोटाकिसले दुर्घटनाबाट आफू लज्जित भएको बताएका छन् ।