काठमाडौं । जापानको अन्तरिक्ष एजेन्सीले आफ्नो नयाँ रकेट प्रक्षेपणको दोस्रो चरणमा इन्जिन फेल भएका कारण प्रक्षेपण नगरिएको जनाएको छ । यो रकेट प्रक्षेपण असफल भएको यो दोस्रो पटक हो।

५७ मिटर अग्लो रकेट तानेगाशिमा अन्तरिक्ष बन्दरगाहबाट सफलतापूर्वक उडेको कमाण्ड सेन्टरले जनाएको छ, तर केही मिनेटपछि यसको गति कम हुन थालेपछि यसलाई ‘सेल्फ डिस्ट्रक्ट’ (आफैलाई नष्ट) गर्न आदेश दिइएको थियो।

जापानी अन्तरिक्ष एजेन्सीका प्रमुख हिरोशी यामाकावाले यसका लागि माफी मागेका छन् र यस विषयमा विस्तृत अनुसन्धान गरिने बताएका छन् ।

यो जापानी अन्तरिक्ष एजेन्सीको लागि ठूलो झट्का भएको विज्ञहरुले बताएका छन् । यसैबीच, जापान सरकारले यसलाई ‘दुर्भाग्यपूर्ण’ भनेको छ।

जापानले झण्डै तीन दशकपछि आफ्नो पहिलो मिडियम लिफ्ट रेन्ज रकेट एच–३ प्रक्षेपण गरेको छ ।

यो रकेटले निगरानीका लागि अलोस-३ उपग्रह बोकेको थियो। यो स्याटेलाइटले उत्तर कोरियाको मिसाइल प्रक्षेपणको निगरानी गर्न सक्ने जापानले जनाएको छ ।

जापानको मध्यम-लिफ्ट दायरा एच-३ रकेट अमेरिकी कम्पनी स्पेसपक्सको फाल्कन-९ को प्रतिद्वन्द्वी मानिन्छ। फाल्कन–९ को तुलनामा यसमार्फत उपग्रहलाई पृथ्वीको कक्षमा जडान गर्दा लाग्ने खर्च घट्नेछ ।

यो रकेट प्रक्षेपण हुन नसकेको यो दोस्रो पटक हो। फेब्रुअरीमा यसलाई प्रक्षेपण गर्ने प्रयास असफल भयो जब रकेट बूस्टरहरूमा त्रुटिको कारण रकेटले उठाउन सकेन।