काठमाडौं । चीनका विदेशमन्त्री किन गाङले रुससँगको सम्बन्धलाई थप मजबुत बनाउने बताएका छन् । उनले चीनमाथि दबाब दिने अमेरिकी प्रयास कहिल्यै सफल नहुने बताए । मङ्गलबार चीनको संसद अधिवेशनको छेउमा सञ्चारकर्मीसँग कुरा गर्दै किनले चीनले आफ्नो मुख्य हितको रक्षा गर्ने र प्रभुत्व, गुटबन्दीको राजनीति र एकपक्षीय प्रतिबन्धको विरोध गर्ने बताए।

किनले चीन र रुसले अन्तर्राष्ट्रिय सम्बन्धका लागि राम्रो उदाहरण बसाइरहेको र शीतयुद्धको दृष्टिकोणबाट द्विपक्षीय सम्बन्धलाई हेर्नु आफ्ना निकटका लागि गलत भएको बताए । उनले रुससँगको चीनको सम्बन्धलाई गठबन्धनबाट अलग, कुनै पनि टकरावबाट अलग र तेस्रो पक्षविरुद्धको कुनै पनि लक्षित गुटभन्दा अलग रूपमा हेर्नुपर्ने बताए।

चीन–रुस व्यापारमा अमेरिकी डलर र युरोको प्रयोग नगर्ने सम्बन्धमा सोधिएको प्रश्नमा चिनियाँ विदेशमन्त्री किनले चीनले सुरक्षित र भरपर्दो मुद्रा प्रयोग गर्ने बताए । उनले मुद्रालाई एकतर्फी प्रतिबन्धका लागि ट्रम्प कार्डको रूपमा प्रयोग गर्न नहुने बताए। युक्रेन युद्धका सम्बन्धमा किनले युक्रेन संकट युरोपेली सुरक्षा प्रशासन प्रणालीका त्रुटिहरूको परिणाम भएको बताए।

किनले युक्रेन संकट समाधानका लागि शान्ति वार्ताको आवश्यकता रहेको बताए । उनले शान्ति स्थापनाका लागि तत्काल वार्ता गर्नुपर्ने र सबै पक्षको चासोलाई सम्मान गर्नुपर्ने बताए । परराष्ट्रमन्त्रीले चीनले पुराना मित्रहरुसँगको सम्बन्धलाई कायम र सुदृढ गर्ने बताए ।

चिनियाँ विदेशमन्त्रीले चिनियाँ बेलुन खसालेको सन्दर्भमा अमेरिकाको कडा आलोचना गर्दै चीनको प्रगति रोक्न वाशिङ्टनको प्रयास सफल नहुने बताए। अमेरिकी हवाई क्षेत्रमा उडिरहेको मानवरहित चिनियाँ बेलुनलाई अमेरिकी लडाकु विमानले खसालेको हालैको घटनालाई उल्लेख गर्दै उनले अमेरिकाले अन्तर्राष्ट्रिय कानुनको उल्लङ्घन गरेको र त्यसलाई खसाल्न बल प्रयोग गरेको आरोप लगाए। किन गाङले भने, अमेरिकाले चीनलाई हराउन चाहेको छ तर चीन द्वन्द्व चाहँदैन ।