काठमाडौं । अमेरिकामा रिपब्लिकन पार्टीबाट राष्ट्रपतिको उम्मेदवार बन्ने दौडमा रहेकी निक्की हेलीले चीन अमेरिका र सम्पूर्ण विश्वका लागि अस्तित्वको खतरा भएको बताएकी छन् । उनले चीनले युद्धको तयारी गरिरहेको पनि बताइन् । चीनले विगत ५० वर्षदेखि अमेरिकालाई हराउने षड्यन्त्र गरिरहेको छ र धेरै हिसाबले चिनियाँ सेनाको क्षमता अमेरिकी सेनाको बराबर भएको उनको भनाइ थियो ।

शुक्रबार न्यु ह्याम्पशायरमा अर्थतन्त्रमा भाषण दिँदै हेलीले यी कुराहरू भनेकी हुन् । निक्कीले भनिन्– ‘चिनियाँ कम्युनिष्ट पार्टीको स्पष्ट उद्देश्य छ, उनीहरु अमेरिकालाई हराउन सक्ने ठूलो र उन्नत सेना निर्माण गर्न चाहन्छन् । यसबाट उनीहरु एसिया र बाहिरका क्षेत्रमा आफ्नो प्रभाव बढाउन चाहन्छन् । चीनको सेना कतिपय मामिलामा हाम्रो बराबर छ भने केही मामिलामा हामीभन्दा अगाडि छ ।’

उनले अगाडि भनिन् – ‘चीनका नेताहरू यति विश्वस्त छन् कि उनीहरूले आफ्नो जासूसी बेलुनहरू हाम्रो आकाशमा पठाउँदैछन्। यसबाहेक, तिनीहरूले क्युबानजिकै जासुसीको लागि आधार निर्माण गरिरहेका छन्। कम्युनिष्ट पार्टी युद्धको तयारीमा छ र चीनका नेताहरू जित्न चाहन्छन्।’ उनले चीनले उत्पादन क्षेत्रमा अमेरिकाबाट रोजगारी खोसिएको आरोप लगाइन् ।

उनले भनिन् -‘यसले अमेरिकाको व्यापारिक गोप्यहरू लिएर महत्त्वपूर्ण उद्योगहरू कब्जा गरेको छ। यी उद्योगहरूमा औषधिदेखि उन्नत प्रविधि समावेश छ। जसका कारण कीर्तिमानी समयमा चीन आर्थिक रूपमा पिछडिएको देशबाट विश्वको दोस्रो ठूलो अर्थतन्त्र बनेको छ ।’