काठमाडौं। एउटा आरोपमा धरौटीमा छुरेर बाहिर निस्केको तीन दिनमै प्रेस काउन्सिल नेपालमा उजुरी परेका टेलिभिजनकर्मी रवि लामिछानेविरुद्ध फेरि अर्को उजुरी परेको छ । अहिलेको उजुरीमा लामिछानेसँगै कञ्चनपुरका निलम्बित डिएसपी अंगुर जिसी पनि मुछिएका छन् । उनीहरुविरुद्ध अदालतको मानहानी गरेको आरोपसहित उजुरी परेको हो ।

रवि लामिछाने, उनले काम गर्ने न्यूज २४ टेलिभिजन र निलम्बित डिएसपी अंगुर जिसीलाई विपक्षी बनाइ जिल्ला अदालत कञ्चनपुरमा उजुरी दर्ता भएको हो । निर्मला पन्तको बलात्कारपछि हत्या गरेको आरोपमा पक्राउ परेर पछि सफाइ पाएका दिलिप विष्टका दाजु खडक विष्टले उजुरी दिएका हुन् । उनले अदालतबाट निर्दोष ठहर भइ सफाइ पाइसकेका दिलिप विष्टलाई जबरजस्ती दोषी देखाउने प्रयास गरिएको आरोप लगाएका छन् ।

लामिछानेले सिधाकुरा जनतासँग कार्यक्रममा डिएसपी जिसीलाई ल्याएर यस विषयमा अन्तरवार्ता गरेका थिए । कार्यक्रममा निलदम्बित डिएसपीलाई निर्दोष साबित गर्ने र दिलिपलाई दोषी साबित गर्ने प्रयास गर्दै अदालतको कानहानी गरिएको उजुरीमा उल्लेख छ । रविले समेत दिलिपलाई बलात्कारी भएको भन्दै अपमानित शब्द प्रयोग गरेको उजुरी पत्रमा उल्लेख छ।