काठमाडौं । हिमाचल प्रदेशको विपद् व्यवस्थापन तथा राजस्व विभागका विशेष सचिव डीसी राणाले बीबीसीसँग कुरा गर्दै बताएअनुसार भारी वर्षाका कारण अहिलेसम्म ४३ जनाको मृत्यु भएको छ र ३७ जना बेपत्ता छन्।

डीसी राणाले भने, “हिमाचल प्रदेशमा जुन १९ मा मनसुन आइपुगेको थियो। त्यसपछि लगातार पानी परिरहेको छ। धेरै ठाउँमा बादल फुटेर धेरै क्षति भएको छ।”

मनसुनमा सडक दुर्घटनाका कारण २६ जनाको मृत्यु भएको पनि डीसी राणाले बताए। उनले भने ‘एक अनुमान अनुसार हिमाचल प्रदेशमा ५०० करोड रुपैयाँभन्दा बढीको सम्पत्तिमा क्षति पुगेको छ।’

वर्षाले मन्डी जिल्लालाई सबैभन्दा बढी असर गरेको छ। यस जिल्लामा २० जनाको मृत्यु भएको छ र ८० घरहरू पूर्ण रूपमा क्षतिग्रस्त भएका छन्।

हिमाचल प्रदेशको मण्डी क्षेत्रमा भारी वर्षाका कारण ब्यास नदीमा बाढी आएको छ। भारतीय मौसम विज्ञान विभागले जुलाई ७ सम्मको लागि अलर्ट जारी गरेको छ।

हिमाचल प्रदेशको मन्डी सिटबाट लोकसभा सांसद कंगना रनौतले इन्स्टाग्राममा लेखेकी छिन्, “हिमाचल प्रदेशमा लगभग हरेक वर्ष बाढीका कारण हुने विनाश देख्दा हृदयविदारक लाग्छ। मैले सिराज र मन्डीका अन्य क्षेत्रहरूमा बाढी प्रभावित क्षेत्रहरूमा पुग्ने प्रयास गरें, तर पूर्व मुख्यमन्त्री जयराम ठाकुरले पर्खन सल्लाह दिएका छन्। मन्डी डीसीले आज पनि रेड अलर्ट जारी गरेका छन्। हामी त्यहाँ सकेसम्म चाँडो पुग्न अधिकारीहरूको स्वीकृतिको पर्खाइमा छौं।”