तेहरान। इरानी संसदको राष्ट्रिय सुरक्षा तथा विदेश नीति समितिका अध्यक्ष इब्राहिम अजिजीले आफ्नो देशले चाँडै नै रणनीतिक महत्त्वको होर्मुज स्ट्रेटबाट हुने जहाज आवतजावतका लागि नयाँ प्रणाली लागू गर्न लागेको घोषणा गरेका छन्।

शनिबार सञ्चारमाध्यमहरूसँग कुरा गर्दै अध्यक्ष अजिजीले यो नयाँ प्रणाली इरानको सार्वभौमसत्ता र अन्तर्राष्ट्रिय व्यापारको सुरक्षाको रक्षा गर्ने उद्देश्यले डिजाइन गरिएको दाबी गरे।

इब्राहिम अजिजीका अनुसार यो नयाँ व्यवस्थाबाट विशेष गरी व्यावसायिक जहाजहरू र इरानसँग सहकार्य गरिरहेका देशहरूले मात्र लाभ उठाउन सक्नेछन्। यसका साथै उनले यो नयाँ प्रणाली अन्तर्गत प्रदान गरिने निश्चित सेवाहरूको बापत जहाजहरूमाथि कर (शुल्क) समेत लगाइने जानकारी दिएका छन्।

विश्वकै सबैभन्दा महत्त्वपूर्ण तेल आपूर्ति मार्गमध्येको एक मानिने होर्मुज स्ट्रेटमा इरानले चाल्न लागेको यो कदमलाई अन्तर्राष्ट्रिय व्यापारिक जगतले चासोका साथ हेरेको छ।

यसैबीच, क्षेत्रमा बढ्दो तनावका बीच इरानका सर्वोच्च नेता मोज्तबा खामेनीका सल्लाहकार मोहम्मद मोख्बरले छिमेकी मुलुकहरू कुवेत र संयुक्त अरब इमिरेट्स (यूएई) लाई कडा राजनीतिक चेतावनी दिएका छन्। सल्लाहकार मोख्बरले इरानले अहिलेसम्म छिमेकीका नाताले धेरै संयम अपनाएको उल्लेख गर्दै त्यो संयमता सधैँभरि कायम नरहने स्पष्ट पारे।

ती देशहरूले आफ्नो भूभाग इरानका शत्रुहरूका लागि खुला छोडेको आरोप लगाउँदै मोख्बरले आक्रोश व्यक्त गरे। उनले अगाडि भने, “इरानले लामो समयदेखि उनीहरूलाई साथी र दाजुभाइ मान्दै आएको थियो, तर अब उनीहरूले आफ्नो स्वतन्त्रता बेचेका छन् र आफ्नो देशको भूमिलाई हाम्रा शत्रुहरूलाई प्रयोग गर्न दिएका छन्।”

खाडी क्षेत्रमा अमेरिकी र अन्य पश्चिमा शक्तिहरूको सैन्य उपस्थितिलाई लिएर इरानले आफ्ना छिमेकीहरूमाथि यसअघि पनि प्रश्न उठाउँदै आएकोमा यो पछिल्लो चेतावनीले क्षेत्रीय कूटनीति थप पेचिलो बन्ने सङ्केत गरेको छ।