काठमाडौं। फिफा विश्वकप २०२६ अन्तर्गत समूह ‘के’ को रोमाञ्चक खेलमा कोलम्बियाले कंगाे लोकतान्त्रिक गणराज्य (डीआर कंगाे) लाई १-० गोल अन्तरले पराजित गर्दै प्रतियोगिताको नकआउट चरण (अन्तिम ३२) मा आफ्नो स्थान सुरक्षित गरेको छ।

मेक्सिकोको एस्तादियो ग्वाडालाहारा (एक्रेन स्टेडियम) मा खेलिएको प्रतिस्पर्धात्मक खेलमा दक्षिण अमेरिकी टोली कोलम्बियालाई जित दिलाउन डिफेन्डर ड्यानियल मुन्योसले गरेको एक मात्र गोल निर्णायक बन्यो।

यस जितसँगै लगातार दुई खेलमा स्पष्ट अंक जोड्दै ६ अंकका साथ कोलम्बिया समूहको शीर्ष स्थानमा उक्लिएको छ। खेलको पहिलो हाफ रणनीतिक रूपमा निकै संघर्षपूर्ण र गोलरहित बराबरीमा सकिएको थियो।

खेलको सुरुवाती समयदेखि नै कोलम्बियाले बलमाथि नियन्त्रण राख्दै कंगाेको रक्षापंक्तिमाथि लगातार दबाब सिर्जना गरेको थियो। खेलको पहिलो २० मिनेटमै कोलम्बियाले विपक्षीको पोस्टमा ५ पटक प्रहार गरेको थियो, जुन यस विश्वकपको सुरुवाती ओभरमा गरिएको सबैभन्दा बढी प्रयास हो।

लुइस डियाज, जेम्स रोड्रिगेज र जोन एभिन एरियसाले गोलका सुन्दर अवसरहरू सिर्जना गरे पनि कङ्गोका गोलकिपर लियोनेल म्पासीले एकपछि अर्को उत्कृष्ट बचाउ गर्दै पहिलो हाफसम्म कोलम्बियालाई रोकेर राखेका थिए।

कोलम्बियाका ड्यानियल मुन्योसले पहिलो हाफै बललाई जाली चुमाए पनि रेफ्रीले त्यसलाई अफसाइड घोषित गरिदिएका थिए। दोस्रो हाफमा कोलम्बियाका प्रशिक्षक नेस्टर लोरेन्जोले रणनीतिमा परिवर्तन गर्दै जुआन फर्नान्डो क्विन्टेरो र जोन कोर्डोबालाई मैदानमा प्रवेश गराए, जसले टोलीको आक्रमणलाई थप धारिलो बनायो।

खेलको ७६औँ मिनेटमा कोलम्बियाले खेलमा डेडलक तोड्न सफल भयो। मैदान भित्र आक्रामक रूपमा अघि बढेका राइट-ब्याक ड्यानियल मुन्योसले क्विन्टेरोको पास र कोर्डोबाको उत्कृष्ट थ्रु-बललाई सदुपयोग गर्दै दायाँ खुट्टाले प्रहार गरी कङ्गोका गोलकिपर म्पासीलाई जिल्ला पार्दै सुन्दर गोल गरे।

कङ्गोका तर्फबाट योआने विसा र सेड्रिक बकाम्बुले काउन्टर अट्याकमार्फत दबाब दिने केही प्रयास गरे पनि कोलम्बियाका गोलकिपर क्यामिलो भार्गासले खेलको अन्तिम समयमा उत्कृष्ट बचाउ गर्दै कंगाेलाई बराबरी गर्न दिएनन्।

८ वटा उत्कृष्ट बचाउ गरेर पनि कङ्गोलाई हारबाट जोगाउन नसकेका म्पासी म्याचको एक आकर्षण बने। यस समूह ‘के’ मा कोलम्बिया ६ अंकसहित शीर्षमा छ भने उज्बेकिस्तानलाई ५-० ले हराएको पोर्चुगल ४ अंकसहित दोस्रो स्थानमा छ।

पहिलो खेलमा पोर्चुगलसँग १-१ को बराबरी खेलेको कंगाेको खातामा १ अंक मात्र छ र अब उसले नकआउटको झिनो आशा जीवित राख्न अन्तिम खेलमा उज्बेकिस्तानलाई पराजित गर्नैपर्ने दबाब छ। यता कोलम्बियाले भने समूह विजेता बन्नका लागि आगामी शनिबार मियामीमा पोर्चुगलको सामना गर्नेछ।