स्टेड (जर्मनी)। जर्मनीको उत्तरी सहर स्टेडस्थित एक युवा कल्याण केन्द्रमा सोमबार भएको गोलीकाण्डमा पाँच जनाको मृत्यु भएको छ। घटनामा सङ्गलग्न रहेको आशङ्कामा दुई जनालाई पक्राउ गरिएको प्रहरीले जनाएको छ।

प्रहरीका अनुसार गोलीकाण्डमा पाँच जना घाइते भएका छन् भने केही अन्य व्यक्तिले पनि सामान्य चोटपटक भोगेका छन्। घटनाबारे विस्तृत अनुसन्धान जारी रहेको र हाल सर्वसाधारणका लागि कुनै सुरक्षा जोखिम नरहेको जनाइएको छ।

घटनापछि ह्याम्बर्गबाट करिब ५० किलोमिटर पश्चिममा रहेको स्टेड सहरमा ठूलो सङ्ख्यामा प्रहरी, एम्बुलेन्स र उद्धार टोली परिचालन गरिएको थियो। स्थानीय सञ्चारमाध्यमले घटनास्थल वरपर हेलिकप्टरसमेत परिचालन गरिएको जनाएका छन्।

प्रहरीले सर्वसाधारणलाई घटनास्थलबाट टाढा रहन र सुरक्षाका लागि सम्बन्धित क्षेत्र खाली गर्न आग्रह गरेको थियो।

जर्मनीमा युरोपकै कडा बन्दुक नियन्त्रण कानुन लागू छ। २५ वर्षभन्दा कम उमेरका व्यक्तिले बन्दुकको अनुमतिपत्र लिनुअघि अनिवार्य रूपमा मनोवैज्ञानिक परीक्षण उत्तीर्ण गर्नुपर्छ। त्यसका बाबजुद समय–समयमा यस्ता सामूहिक गोलीकाण्डका घटना हुने गरेका छन्।

फेब्रुअरी २०२० मा मध्यजर्मनीको हानाउ सहरमा एक अतिदक्षिणपन्थी आक्रमणकारीले नौ जनाको गोली हानी हत्या गरेको थियो। त्यसैगरी मार्च २०२३ मा ह्याम्बर्गमा यहोवाका साक्षीको प्रार्थना सभामा भएको गोलीकाण्डमा छ जनाको मृत्यु भएको थियो।