काठमाडौं। शिक्षा तथा खेलकुदमन्त्री सस्मित पोखरेल र नेपाल भ्रमणमा रहनुभएका एसियाली विकास बैंक (एिडबी) का अध्यक्ष मासातो कान्दाले काठमाडौँको त्रिपुरेश्वरस्थित विश्वनिकेतन माध्यमिक विद्यालयको संयुक्त रूपमा अवलोकन गरेका छन्। एडिबीको सहयोगमा भूकम्पपछिको पुनःनिर्माण गरिएका विद्यालयका भवन, विज्ञान प्रयोगशाला (साइन्स ल्याब) तथा स्मार्ट कक्षाको उनीहरूले अवलोकन गरेका हुन्।

अवलोकनका क्रममा मन्त्री पोखरेल र एडिबी अध्यक्ष कान्दाले शिक्षकका लागि ‘एआई लिट्रेसी एण्ड डिजिटल कम्पिटेन्सी तालिम मोडुलको पाइलट’ शुभारम्भ गरे। अनलाइन तथा स्वअध्ययन (सेल्फ-लर्निङ) मा आधारित उक्त तालिम एडिबी र शिक्षा तथा खेलकुद मन्त्रालयको प्राविधिक सहकार्यमा विकास गरिने जनाइएको छ। तालिममार्फत शिक्षकहरूलाई कृत्रिम बुद्धिमत्ता (एआई) सम्बन्धी आधारभूत ज्ञान तथा डिजिटल दक्षता विकास गराइनेछ।

कार्यक्रममा मन्त्री पोखरेलले नेपालको शिक्षा क्षेत्रमा एडिबीले करिब पाँच दशकदेखि पुर्‍याउँदै आएको सहयोगप्रति आभार व्यक्त गर्दै डिजिटल रूपान्तरण, प्राविधिक तथा व्यावसायिक शिक्षालगायत प्राथमिकता क्षेत्रमा आगामी दिनमा पनि सहकार्य अझ सुदृढ हुने विश्वास व्यक्त गरे।

एडिबी नेपाल सरकारको विद्यालय शिक्षा क्षेत्र योजनाको प्रमुख विकास साझेदारमध्ये एक मानिन्छ। विद्यालय पूर्वाधार निर्माणदेखि शिक्षा सुधारका विभिन्न कार्यक्रममार्फत एडिबीले लामो समयदेखि सहयोग गर्दै आएको मन्त्रालयले जनाएको छ।