काठमाडौं । स्पेनका उदीयमान स्टार खेलाडी लामिन यामालले डिफेन्डिङ च्याम्पियन अर्जेन्टिना विरुद्धको ऐतिहासिक विश्वकप फाइनलको सपना बुन्दै फुटबल आइकन लियोनेल मेस्सीसँग जर्सी साट्ने आफ्नो तीव्र इच्छा व्यक्त गरेका छन्।

बार्सिलोनाका यी युवा खेलाडीले प्रतियोगिता अघिका ठूला दाबीहरू भन्दा पनि टोलीका लागि यो प्रतिष्ठित ट्रफी जित्नु नै एक मात्र वास्तविक लक्ष्य रहेको कुरामा जोड दिएका छन्। सञ्चारमाध्यम ‘मुन्दो डिपोर्टिभो’ सँगको एक विशेष विश्वकप प्रश्नावलीका क्रममा यामालले आफ्ना ठूला महत्त्वाकांक्षाहरू खुलाएका हुन्।

यी प्रतिभाशाली विङ्गरले यदि स्पेन (ला रोजा) फाइनलसम्म पुग्न सफल भएमा अर्जेन्टिनासँगको ड्रिम भिडन्तका लागि आफू लालायित रहेको बताए। वास्तवमा, यी दुई टोलीबीच गत मार्चमा कतारमा बहुप्रतीक्षित ‘फिनालिसिमा’ खेल हुने तालिका तय भए पनि मध्यपूर्वको तनाव र सुरक्षा चिन्ताका कारण उक्त खेल रद्द गरिएको थियो।

यामालको अन्तिम लक्ष्य आफ्नो देशलाई विश्वकपको उपाधि दिलाउनु मात्र नभएर बार्सिलोनाका पूर्व लेजेन्ड मेस्सीसँग जर्सी साट्ने दुर्लभ अवसर प्राप्त गर्नु पनि हो। यस प्रतिष्ठित प्रतियोगितामा आफ्ना प्राथमिकता र व्यक्तिगत लक्ष्यहरूबारे छलफल गर्ने क्रममा यामालले स्पष्ट जवाफ दिए।

जब उनलाई कुन खेलाडीसँग जर्सी साट्न चाहनुहुन्छ भनी सोधियो, उनले “मेस्सीसँग” भनी जवाफ दिए। त्यसैगरी, स्पेन फाइनलमा पुगेमा कसको सामना गर्न चाहनुहुन्छ भन्ने प्रश्नमा मोरक्कन मूलका यी युवा खेलाडीले “अर्जेन्टिना” भनी प्रतिक्रिया दिए।

उत्तर अमेरिकामा भइरहेको यस विश्वकपमा धेरै टोली र खेलाडीहरूले अचम्मको प्रदर्शन गर्दै दर्शकहरूको मन जित्न सफल भएका छन्। प्रतियोगिताको अहिलेसम्मकै सबैभन्दा ठूलो सरप्राइज (आश्चर्य) को रूपमा यामालले मोरक्कोका इस्माइल साइबारीलाई रोजेका छन्।

प्रतियोगिताकै बीचमा पीएसभीबाट बायर्न म्युनिखमा स्थानान्तरण निश्चित भएका यी फरवार्डले लगातार तीन खेलमा गोल गर्नुका साथै नेदरल्याण्ड्स विरुद्धको टाइब्रेकरमा निर्णायक पेनल्टी प्रहार गरेका थिए।

तर, दुर्भाग्यवश २५ वर्षीय साइबारी क्यानडा विरुद्धको खेलमा घाइते भएपछि फ्रान्ससँग पराजित भएको क्वार्टरफाइनल खेलमा मैदान बाहिरै रहन बाध्य भए।

यो सपनाको फाइनल साकार हुनुअघि अर्जेन्टिनाले उत्कृष्ट लयमा रहेको इङ्गल्याण्डको कडा चुनौतीलाई पार गर्नुपर्नेछ। यदि अर्जेन्टिनाले उक्त खेल जितेमा यामालले बार्सिलोनाका लेजेन्ड मेस्सीको सामना गर्ने अवसर पाउनेछन् । जतिबेला मेस्सीले सन् २००६ को विश्वकपमा डेब्यु गरेका थिए त्यतिबेला यमाल जन्मिएकै थिएनन् ।

अर्कोतर्फ, लगातार १२ खेलमा अपराजित रहेको कीर्तिमान बनाएको मेस्सी नेतृत्वको अर्जेन्टिनी टोली सन् १९६२ मा ब्राजिलले राखेको कीर्तिमान पछि लगातार दुई पटक विश्वकप जित्ने पहिलो राष्ट्र बन्ने लक्ष्यका साथ मैदानमा उत्रिँदैछ।