काठमाडौं। सरकारले आर्थिक वर्ष २०८२/८३ को असार २४ गतेसम्ममा पाँच लाख ६१ हजार ४९३ दशमलव ८५ मेट्रिकटन रासायनिक मल आपूर्ति गरेको छ।

यो परिमाण सरकारले राखेको वार्षिक छ लाख मेट्रिकटन रासायनिक मल आपूर्तिको लक्ष्यको करिब ९४ प्रतिशत जति हुन आउँछ। कृषि तथा पशुपन्छी विकास मन्त्रालयका अनुसार गत आर्थिक वर्षमा रासायनिक मलका लागि कुल २८ अर्ब ८२ करोड १४ लाख रुपैयाँ बजेट विनियोजन गरिएको थियो।

सोही अवधि अन्तर्गत गत असार २४ गतेसम्म चार लाख ९१ हजार ३०० मेट्रिकटन रासायनिक मल खरिदका लागि टेन्डर प्रक्रियासमेत सफलतापूर्वक सम्पन्न भइसकेको छ।

मन्त्रालयले उपलब्ध गराएको विवरण अनुसार हालसम्म दुईवटा कम्पनीमार्फत तीन लाख २७ हजार ५७९ दशमलव ८० मेट्रिकटन युरिया, दुई लाख तीन हजार ४२६ दशमलव ३० मेट्रिकटन डीएपी र ३० हजार ४८७ दशमलव ७५ मेट्रिकटन पोटास आपूर्ति गरिएको छ, जसको कुल योग पाँच लाख ६१ हजार ४९३ दशमलव ८५ मेट्रिकटन हुन आउँछ।

यसैगरी, उक्त अवधिसम्म आइपुग्दा देशभरका विभिन्न सरकारी गोदामहरूमा ९२ हजार ५९२ दशमलव ३५ मेट्रिकटन रासायनिक मल मौज्दात अवस्थामा रहेको थियो। यस मौज्दात परिमाणभित्र ४९ हजार १०४ दशमलव ३० मेट्रिकटन युरिया, २४ हजार १२ दशमलव ८५ मेट्रिकटन डीएपी र १९ हजार ४७५ दशमलव २० मेट्रिकटन पोटास सामेल छ।

किसानहरूका लागि मल वितरणको अवस्था हेर्दा, अघिल्लो आर्थिक वर्षको बाँकी मौज्दातलाई समेत समावेश गरेर असार २४ गतेसम्म देशभर कुल पाँच लाख १८ हजार २७८ दशमलव ५५ मेट्रिकटन रासायनिक मल बिक्री भइसकेको छ।

यसरी बिक्री भएको मलमा तीन लाख सात हजार १६ दशमलव ६० मेट्रिकटन युरिया, एक लाख ९२ हजार ९३१ दशमलव १५ मेट्रिकटन डीएपी र १८ हजार ३३० दशमलव ८० मेट्रिकटन पोटास रहेको मन्त्रालयले जनाएको छ।

यसका साथै, हाल बाह्य मार्गबाट थप २८८ दशमलव ७५ मेट्रिकटन रासायनिक मल ढुवानीको क्रममा रहेको छ, जसमा ८६ दशमलव ०५ मेट्रिकटन युरिया र २०२ दशमलव ७० मेट्रिकटन डीएपी समावेश छ।