हेटौंडा। बागमती प्रदेशमा नयाँ सरकार गठनका लागि राजनीतिक दलहरूले आपसी छलफल र कूटनीतिक पहललाई तीव्र तुल्याएका छन्।

नेपाली कांग्रेस नेतृत्वको वर्तमान सरकारबाट नेकपा (एमाले) ले समर्थन फिर्ता लिएपछि सिर्जना भएको राजनीतिक गतिरोध अन्त्यका लागि प्रमुख दलहरू आ-आफ्नो नेतृत्वमा सरकार बनाउने गृहकार्यमा जुटेका हुन्।

नयाँ सत्ता समीकरणका लागि एमाले र नेपाली कम्युनिस्ट पार्टी (नेकपा) बिच सत्ता साझेदारी गर्ने प्रारम्भिक सहमति भइसकेको छ। सोही सहमति अनुसार स्पष्ट बहुमत जुटाउनका लागि अन्य साना दलहरूसँग पनि वार्ता अघि बढाइएको एमाले संसदीय दलका प्रमुख सचेतक एकालाल श्रेष्ठले जानकारी दिए।

उनका अनुसार राष्ट्रिय प्रजातन्त्र पार्टी (राप्रपा), हाम्रो नेपाली पार्टी (हानेपा) र नेपाल मजदुर किसान पार्टी (नेमकिपा) सँग निरन्तर संवाद भइरहेको र चाँडै नै प्रदेशको राजनीतिक गतिरोध अन्त्य हुनेछ।

यसैबीच, नयाँ सरकार गठनको अन्योल अन्त्य गर्न मुख्यमन्त्री इन्द्रबहादुर बानियाँले पनि सर्वदलीय छलफल चलाएका छन्।

नेपाली कांग्रेस बागमती प्रदेश संसदीय दलका प्रमुख सचेतक पुकार महर्जनका अनुसार मुख्यमन्त्री बानियाँले नयाँ सरकारका लागि स्पष्ट बहुमत जुटाउन वा मुलुकको राजनीतिक स्थिरताका लागि वर्तमान कांग्रेस नेतृत्वकै सरकारलाई निरन्तरता दिन अन्य दलहरूसँग आग्रह गरेका छन्।

कुल ११० सदस्यीय बागमती प्रदेश सभामा हाल ११० मध्ये १०९ सांसद कायम रहेका छन् (राप्रपाका एक सांसद निलम्बित अवस्थामा रहेकाले)। यस प्रदेशमा सरकार गठनका लागि बहुमत अर्थात् कम्तीमा ५५ सांसदको समर्थन आवश्यक पर्दछ।

प्रदेश सभामा सबैभन्दा ठूलो दल नेपाली कांग्रेसको ३७ सिट (एक निलम्बनपछि ३६ सक्रिय) छ भने एमालेसँग २७ सिट र नेकपासँग २१ सिट रहेको छ। यस्तै राप्रपासँग १३ (१२ सक्रिय), नेमकिपासँग ३ र हाम्रो नेपाली पार्टीसँग २ सिट रहेको छ।

नेपाली कांग्रेस र एमाले-नेकपा गठबन्धन दुवै पक्षलाई साना दलहरूको सहयोगविना स्पष्ट बहुमत (५५ सिट) पुर्‍याउन कठिन देखिएकाले नयाँ सरकार निर्माणको प्रक्रिया अझै निष्कर्षमा पुग्न सकेको छैन।

दुवै पुराना राजनीतिक शक्तिहरूले साना दलहरूलाई आफ्नो पक्षमा पारेर सरकारको नेतृत्व हत्याउने होडबाजी जारी राखेका छन्।