काठमाडौं । युक्रेनमा पोल्याण्ड सीमा नजिकैको याहोदिन क्षेत्रमा एक यात्रुवाहक रेललाई रुसी ड्रोनले निशाना बनाएको छ। आक्रमणबाट रेलको इन्जिनमा क्षति पुगेको छ। यद्यपि, घटनामा कोही पनि घाइते वा हताहत भएको सूचना छैन।

विशेष कुरा के छ भने, ब्रिटेनका पूर्व प्रधानमन्त्री बोरिस जोन्सन र युरोपका शीर्ष सुरक्षा अधिकारीहरूको टोली यही रेल मार्ग हुँदै अर्कै ट्रेनमा सवार भई आक्रमण हुनुभन्दा केही समयअघि मात्र पार भएको थियो।

युक्रेनी अधिकारीहरूका अनुसार यो आक्रमण याहोदिनमा भएको हो, जुन पोल्याण्डको सीमाबाट करिब दुई किलोमिटर टाढा अवस्थित छ।

बोरिस जोन्सनका साथ युरोपेली मुलुकहरूका कैयौँ राष्ट्रिय सुरक्षा सल्लाहकारहरू पनि यही रेल मार्ग भएर गएका थिए। तिनमा ब्रिटेनका राष्ट्रिय सुरक्षा सल्लाहकार जोनाथन पावेल पनि समावेश थिए। सबै अधिकारीहरू किभमा आयोजना गरिएको एक सम्मेलनमा सहभागी भएर फर्किँदै थिए।

रुसले पनि आक्रमणको पुष्टि गरेको छ। रुसी पक्षका अनुसार पश्चिमी युक्रेनमा रेलवेको बुनियादी पूर्वाधारलाई निशाना बनाएर आक्रमण गरिएको हो। यद्यपि, युक्रेनको सरकारी रेलवे कम्पनीले ड्रोनको वास्तविक निशाना कूटनीतिज्ञहरूलाई बोकेको ट्रेन नै हुन सक्ने आशङ्का व्यक्त गरेको छ।

रेलवे कम्पनीका अनुसार समयतालिकामा गरिएको परिवर्तनका कारण कूटनीतिज्ञहरू सवार ट्रेन निर्धारित समयभन्दा अगावै स्टेसनबाट प्रस्थान गरेको थियो। रुसका तर्फबाट लगातार भइरहेका हवाई आक्रमणको खतरालाई मध्यनजर गर्दै ट्रेनको समयमा परिवर्तन गरिएको थियो।

कम्पनीले जनाए अनुसार जुन ट्रेनमाथि ड्रोन आक्रमण भयो, त्यसमा सवार यात्रुहरूलाई बाहिर निस्कने आदेश आक्रमण हुनुभन्दा मात्र १५ मिनेटअघि दिइएको थियो। त्यसलगत्तै रुसी जेट-प्रोपेड ड्रोनले ट्रेनको इन्जिनलाई निशाना बनाएको थियो।