काठमाडौं।  गोरखाको चुमनुब्रीस्थित बूढीगण्डकी नदीमा आएको आकस्मिक र भीषण बाढीका कारण तटीय क्षेत्रमा जोखिम बढेपछि गृहमन्त्री सुधन गुरुङले सो क्षेत्रका बासिन्दाहरूलाई तत्काल सुरक्षित स्थानमा स्थानान्तरण हुन र उच्च सतर्कता अपनाउन सार्वजनिक अपिल गरेका छन्।

सामाजिक सञ्जालमार्फत गृहमन्त्री गुरुङले आफ्नै गृहजिल्ला तथा निर्वाचन क्षेत्र (गोरखा-१) मा परेको प्राकृतिक विपत्तिप्रति गम्भीर ध्यानाकर्षण भएको जनाउँदै सिर्दिबास, जगत, सल्लेरी, खोलबेसी, माछाखोला, सोती, आर्खेत र आरुघाट क्षेत्रका बासिन्दालाई ढिलाइ नगरी सुरक्षित ठाउँतर्फ जान आग्रह गरेका हुन्।

न्याक्चेत-फिलिम पुल बग्यो, घट्टेखोलामा लेदोसहितको बाढी

आइतबार बिहान करिब ४:३० बजे चुमनुब्री गाउँपालिका-३ स्थित फिलिममा पहिरोले थुनिएको बूढीगण्डकी नदी फुटेपछि तटीय क्षेत्रमा लेदो र गेग्रानसहितको भीषण बाढी पसेको छ। बाढीका कारण चुमनुब्री-३ को न्याक्चेत र फिलिम बजार जोड्ने पुल बगेको छ भने घट्टेखोला क्षेत्रका केही घरहरूमा लेदोसहितको पानी पसेर क्षति पुर्‍याएको छ। नदीको बहाव अझै निरन्तर बढिरहेको छ।

यसअघि उङगिलुङ खोलामा आएको बाढीले धार्चे र चुमनुब्री जोड्ने पर्यटकीय माछीखोला पुलका साथै आरुघाटको सोती र मान्बु जोड्ने पुलसमेत बगाइसकेको छ। बाढीमा परी ४ वटा गोठ, १५ वटा याक-नाक बग्नुका साथै गोठ हेर्न बसेका ४ जना स्थानीय सम्पर्कविहीन भएका छन्।

सेना, प्रहरी र हेलिकप्टरमार्फत उद्धार जारी

घटनालगत्तै गृह मन्त्रालयको समन्वयमा नेपाल प्रहरी, सशस्त्र प्रहरी बल र नेपाली सेनाको टोली उद्धार तथा राहतका लागि खटिएका छन्। काठमाडौंबाट सेनाको ‘कम्पोजिट क्विक रेस्पोन्स टिम’ हेलिकप्टरमार्फत घटनास्थलमा परिचालन भइसकेको छ।

सेनाको टोलीले बाढी र पहिरोको उच्च जोखिममा परेको जगत् गाउँबाट ६ जना स्थानीयको उद्धार गरिसकेको छ भने प्रभावित क्षेत्रमा अवलोकन (रेकी) र माइकिङ गरी सतर्कता अपनाउन अनुरोध गरिरहेको छ।

गृहमन्त्री गुरुङले प्रभावित क्षेत्रका नागरिकहरूलाई धैर्य र सुरक्षित रहन आग्रह गर्दै कुनै पनि आपत्कालीन सहायता वा सूचनाका लागि गृह मन्त्रालयको खोज तथा उद्धार नियन्त्रण कक्षमा सम्पर्क गर्न अपिल गरेका छन्।