काठमाडौँ । चीनमा ब्यापक फैलिएको कोरोना भाइरसबाट मंगलबार मात्रै ६५ जनानको ज्यान गएको छ। चीन बाहिर मंगलबार हङकङमा एक जनाको ज्यान गएको छ ।

हालसम्म कोरोना भाइरसबाट चीनमा ४९० जनाको ज्यान गइसकेको र २४ हजार ३२४ जना संक्रमित भएको  चाईना डेलीले जनाएको छ । यसअघि उक्त भाइरसका कारण फिलिपिन्समा पनि एक जनाको ज्यान गएको थियो ।

चीनमा सोमबार पनि ६४ जनाको मृत्यु भएको थियो ।

चीन बाहिर ४० देशमा कोरोनाको प्रकोप देखिएको र उक्त भाइरसबाट करिब ५० जना संक्रमित भएको बीबीसीले जनाएको छ ।

विश्व स्वास्थ्य सङ्गठनले विश्वव्यापी स्वास्थ्य आपतकालको घोषणा गरिसकेको छ ।

यसैगरी कोरोना भाइरसबाट अतिप्रभावित क्षेत्र चीनको हुबे प्रान्तमा रहेका नेपालीहरूलाई उद्धार गर्ने सरकारले तयारी गरेको छ ।

बेइजिङस्थित नेपाली दूतावासले नेपाल फर्किन चाहने नेपाली नागरिकहरूलाई आवेदन दिन आह्वान गरेकोमा एक सय ८० जना नेपालीले फारम भरेका थिए ।

सरकारले ती नेपालीलाई काठमाडौँ ल्याउन २ विमान तयारी अवस्थामा राखेको छ।

यसअघि अमेरिका, ब्रिटेन, अस्ट्रेलिया, भारत र अन्य देशले वुहान र वरपर रहेका आफ्ना नागरिकलाई फिर्ता लगेका थिए।

पछिल्लो विवरणअनुसार ताइवानले पनि वुहानबाट आफ्ना झन्डै ५०० नागरिकको उद्धार गरेको छ।

उनीहरू ताइपेई पुगिसकेका छन् र उनीहरूलाई दुई सातासम्म अलग्गै राखेर स्वास्थ्य परीक्षण गरिने बताइएको छ।