काठमाडौं। यूएईमा जारी आईपीएलको मिडट्रमको अन्तिम खेलमा सोमबार रोयल च्यालेन्जर्स बैंगलोरले पहिला ब्याटिंग गर्दै २ विकेटमा १९४ रन बनाएको छ। शारजहाँ क्रिकेट मैदानमा एबीडी भिलर्सले विस्फोटक ब्याटिंग गरेपछि कोलकाता नाइट राइडर्सले १९५ रनको विशाल लक्ष्य पाएको छ। भिलर्सले ३३ बलमा ७३ रन बनाउनेक्रममा ६ छक्का प्रहार गरे।

शारजहाँ मैदान छोटो बाउन्ड्रीको मैदान हो। यो मैदानमा पहिला ब्याटिंग गर्ने टिमले २ सयभन्दा तल रन बनाएको यो दोस्रो पटक हो। यसअघि दिल्ली क्यापिटल्सले पनि २ सयभन्दा तलको स्कोर बनाएर सफलतापूर्वक बचाऊ पनि गरेको थियो।

जारी लिगमा कोलकाताले आफूले खेलेका ६ मध्ये ४ खेलमा जित हात पारेको छ भने बेंगलोरले पनि ६ खेलमा ४ खेल जितेको छ। अंक तालिकामा नेटरन रेटका आधारमा कोलकाता बेंगलोरभन्दा माथि छ। तर, आजको खेलको निर्णयले यी दुई टिमबीच स्पष्ट दुई अंकको फरक हुने छ।

जारी आईपीएलमा सहभागी ८ वटै टिमले सोमबार आ आफ्ना आधा खेल (७ वटा) पूरा गर्दै छन्। यसपछि मिडट्रम् वीण्डोमार्फत खेलाडी ट्रान्सफरसमेत हुने नियम बनाइएकोले सोमबारसम्म एक टिममा रहेका खेलाडी अबको खेलमा अर्को टिमको जर्सीमा पनि देख्न सकिने छ।