काठमाडौं । साउदी अरेबियाले छिट्टै संकटग्रस्त पाकिस्तानलाई तीन अर्ब डलरको ऋण तिर्न थप समय दिने निर्णय गर्नेछ। साउदी अरबका विदेशमन्त्री मोहम्मद अल-जदानले समाचार एजेन्सी रोयटर्सलाई सो जानकारी दिएका हुन् ।

डाभोसमा विश्व आर्थिक मञ्चको कार्यक्रमका लागि गएका उनले समाचार एजेन्सी रोयटर्ससँग कुरा गर्दै भने, “हामी हाल पाकिस्तानलाई तीन अर्ब डलरको निक्षेपको अवधि बढाउने विचार गरिरहेका छौं।”

गत वर्ष, साउदी अरेबियाले विदेशी मुद्रा सञ्चिति बढाउन मद्दत गर्न स्टेट बैंक अफ पाकिस्तानमा तीन अर्ब डलर जम्मा गरेको थियो। जदानले पाकिस्तान आफ्नो महत्वपूर्ण सहयोगी भएको र साउदी सधैं सहयोगका लागि आफ्नो साथ रहने बताए ।

आकाशिंदो महंगी, घट्दै गएको विदेशी मुद्रा सञ्चिति र मुद्राको मूल्यमा आएको गिरावटको बीचमा पाकिस्तानलाई अहिले विदेशी आर्थिक सहायताको नितान्त आवश्यकता छ।

पाकिस्तानको आर्थिक अवस्था नाजुक छ । विदेशी मुद्रा सञ्चिति पनि यहाँ खाली छ । गत हप्ता, पाकिस्तानले आयात घटाउन र विदेशी मुद्रा बचत गर्न सबै गैर-आवश्यक विलासिताका सामानहरूको आयातमा प्रतिबन्ध लगाएको थियो। पाकिस्तानमा यो अवस्थालाई आर्थिक संकटकाल भनिएको छ ।

पाकिस्तानको चालू खाता घाटा १७ अर्ब डलर नाघेको छ । पाकिस्तानको विदेशी मुद्रा सञ्चिति १६ अर्ब डलरमा झरेको छ र त्यहाँको मुद्रा पनि एक डलरको तुलनामा २०० रुपैयाँ पुगेको छ । पाकिस्तानको सूचना तथा प्रसारण मन्त्री मरियम औरङ्गजेबले पत्रकारहरुलाई बताइन् कि प्रतिबन्ध लगाइएका विलासी सामानहरु थोरै मानिसहरुले प्रयोग गर्ने गरेका छन् ।

मे १५ मा, पाकिस्तानको वित्तीय मामिला अनुसन्धान एजेन्सी, संघीय राजस्व बोर्डका पूर्व अध्यक्ष सैयद शब्बर जैदीले एक ट्वीटमा भने कि पाकिस्तानको अवस्था श्रीलंका भन्दा फरक छैन।