काठमाडौं । प्रवर्तन निदेशालय (ईडी) ले नेसनल हेराल्डसँग सम्बन्धित मनी लन्ड्रिंग मुद्दामा कांग्रेस प्रमुख सोनिया गान्धी र उनका छोरा राहुल गान्धीलाई जुन ८ मा बोलाएको छ।

कांग्रेस प्रवक्ता रणदीप सुरजेवाला र कांग्रेसका वरिष्ठ नेता अभिषेक मनु सिंघवीले बुधबार पत्रकार सम्मेलनमा आफ्नो पार्टी यस मामिलामा नझुक्ने बताए।

सुरजेवालाले भने, ‘मुद्दालाई मोड्न माहिर मोदी सरकारले कायरतापूर्ण षड्यन्त्र गरेको छ । नेशनल हेराल्ड प्रकरणमा प्रधानमन्त्री मोदीले ईडीमार्फत बोलाउन पठाएका छन् । तानाशाह डराएको स्पष्ट छ । प्रष्ट छ, शासनका सबै मोर्चामा आफ्नो असफलता लुकाउन देशलाई भ्रमित गरिरहेको छ ।’

अभिषेक मनु सिंघवीले भने, ‘यो एकदमै मनगढन्ते काल्पनिक आरोप हो र यो एक प्रकारले हास्यास्पद छ। सत्तारुढ दलले आफ्ना प्रत्येक राजनीतिक प्रतिद्वन्द्वीमाथि हमला गर्छ । यो प्रतिशोधको भावनाबाट भइरहेको छ। यस मुद्दामा २०१४-१५ देखि अदालतमा सुनुवाइ चलिरहेको छ । अब सात वर्षपछि यसमा ईडी ल्याइएको छ । जहाँ पैसा छैन, सम्पत्ति हस्तान्तरण छैन, त्यहाँ कसरी सम्पत्ति शुद्धीकरणको मुद्दा आयो ? एलेएललाई सुदृढ पार्न, यसलाई इक्विटीमा रूपान्तरण गरिएको थियो जसमा ऋण चुक्ता गरियो। यो काम बिल्कुल जायज छ। यसबाट आएको पैसा कर्मचारीको तलबमा खर्च भयो ।’