काठमाडौं । २०१६ दादासाहेब फाल्के अवार्डबाट सम्मानित वरिष्ठ अभिनेता तथा निर्देशक के विश्वनाथको बिहीबार हैदराबादको एक निजी अस्पतालमा निधन भएको छ। उनी ९२ वर्षका थिए ।

तेलुगु फिल्मका लागि पाँचवटा राष्ट्रिय फिल्म पुरस्कार, ११ फिल्मफेयर अवार्ड र सात नन्दी अवार्डबाट सम्मानित भएका के विश्वनाथको तेलुगु फिल्महरूमा योगदान प्रशंसनीय छ। उनले सन् १९९२ मा पद्मश्री अवार्ड पनि पाएका थिए । उनले धेरै अन्तर्राष्ट्रिय सम्मान पनि पाएका छन् ।

उनको निधनमा धेरै सेलिब्रेटीहरूले उनलाई श्रद्धाञ्जली अर्पण गर्दै उनको कामको सम्झना गरेका छन्। अनिल कपूरले ट्वीटरमा लेखेका छन्, “के विश्वनाथ जी, तपाईंले मलाई धेरै कुरा सिकाउनुभयो, फिल्म ‘ईश्वर’ को समयमा तपाईंसँग सेटमा हुनु भनेको मन्दिरमा हुनु जस्तै थियो… मेरो गुरुलाई श्रद्धाञ्जली।

तेलंगानाका गभर्नर डा तमिलिसाई सौन्दरराजनले लेखेका छन्, “दिग्गज फिल्म निर्देशक श्री के विश्वनाथ गुरू (पूज्य) को निधनको खबर सुनेर गहिरो दुःख लाग्यो।”

के विश्वनाथले साउन्ड रेकर्डिस्टको रूपमा आफ्नो करियर सुरु गरेका थिए। आफ्नो ६० वर्ष लामो फिल्म करियरमा उनले विभिन्न मुद्दामा आधारित ५३ वटा तेलुगु र हिन्दी फिल्महरू निर्देशन गरे।

जातिय प्रथा, छुवाछुत, लैङ्गिक भेदभाव, दाइजो जस्ता सामाजिक मुद्दामा चलचित्र बनाउने उनको विशेषता थियो । निर्देशकका रूपमा उनको अन्तिम फिल्म सन् २०१० मा ‘शुभप्रधाम’ थियो ।

के विश्वनाथले पनि सन् १९९५ मा फिल्म ‘शुभ संकल्पम’ बाट आफ्नो अभिनय करियर सुरु गरेका थिए । उनले धेरै तमिल र तेलुगु फिल्महरूमा अभिनय गरे।