काठमाडौं । पाकिस्तानको इलेक्ट्रोनिक मिडिया अनुगमन निकायले पूर्वप्रधानमन्त्री इमरान खानको भाषण टिभी च्यानलमा ‘लाइभ (प्रत्यक्ष प्रसारण) र रेकर्ड गरिएको प्रसारणमा प्रतिबन्ध लगाएको छ ।

तोशखाना मुद्दामा इमरान खानमाथि गिरफ्तारीको खतरा छ । तर, मार्च ७ मा अदालतमा हाजिर हुने भन्दै उनी यसबाट जोगिए । त्यसपछि उनले ‘सरकारी संस्थाविरुद्ध भड्काउने भाषण’ दिए ।

समाचार एजेन्सी पीटीआईका अनुसार, पाकिस्तान तहरीक-ए-इन्साफ (पीटीआई) का अध्यक्ष इमरान खानले लाहोरस्थित आफ्नो निवास बाहिर पार्टी कार्यकर्ताहरूलाई सम्बोधन गर्दै भने, ‘उनी कहिल्यै कुनै व्यक्ति वा संस्थाको अगाडि झुकेका छैनन्।’

उनले सत्तारुढ दलका नेताहरूलाई पनि निशाना बनाएका छन् कि उनीहरूले आफ्नो सम्पत्ति विदेशमा लुकाएर राखेका छन् र पाकिस्तानका पूर्व सेना प्रमुख जनरल (रिटायर्ड) कमर जावेद बाजवाले कानुनी मामिलामा संरक्षण गरेका छन्।

यसअघि इस्लामावाद पुलिस आइतवार इमरान खानलाई तोशाखाना मुद्दामा पक्राउ गर्नको लागि उनको घर पुगेको थियो। खानको कानुनी टोलीले पूर्वप्रधानमन्त्रीलाई मार्च ७ मा अदालतमा हाजिर हुने आश्वासन दिएपछि प्रहरी फिर्ता भयो।

पाकिस्तान इलेक्ट्रोनिक मिडिया नियामक प्राधिकरण (पेमरा) ले पुरानो निर्देशनहरूको आधारमा यो प्रतिबन्ध लगाएको छ, जस अन्तर्गत सबै इजाजतपत्र प्राप्त च्यानलहरूलाई देश वा सरकारी संस्थाहरू विरुद्ध सामग्री चलाउन निषेध गरिएको छ।

पेमराले भन्यो कि आफ्नो भाषणमा इमरान खानले “देशका संस्थाहरू विरुद्ध आधारहीन आरोप लगाए र आफ्नो उत्तेजक भाषणहरू मार्फत घृणा फैलाए। उनको बयानले कानून र व्यवस्थालाई खतरामा पारेको छ र शान्तिलाई खलल पार्न सक्छ।” नियामक निकायले आदेश नमान्ने च्यानलको लाइसेन्स खारेज गर्न सक्ने जनाएको छ ।