काठमाडौं । इरानले ग्यास पाइपलाइन परियोजना पूरा नगरेको भन्दै पाकिस्तानलाई जरिवाना लगाउने चेतावनी दिएको छ ।

अर्कोतर्फ अमेरिकाले पाकिस्तानले यो परियोजना अगाडि बढाएमा परिणाम भोग्ने चेतावनी दिएको छ ।

पाकिस्तानी पत्रकार जहानजाइब अलीले अमेरिकी विदेश मन्त्रालयका प्रवक्तालाई सोधेका थिए, “इरानले ग्यास पाइपलाइन परियोजना पूरा नगरेकोमा पाकिस्तानलाई १८ अर्ब डलर जरिवाना गर्ने धम्की दिएको छ।”

“जब पाकिस्तानले इन्धनको आवश्यकता हुँदाहुँदै पनि परियोजना अगाडि नबढाउन अमेरिकाको दबाबमा छ र प्रतिबन्धको धम्की दिएको छ।”

अलीले सोधे, “पाकिस्तानले यो परियोजना पूरा गर्न प्रतिबन्धबाट छुट मागेको छ। यसमा तपाईको टिप्पणी के छ?”

यसबारे अमेरिकी विदेश मन्त्रालयका प्रवक्ता म्याथ्यु मिलरले भने, ‘हामी इरानमाथिको प्रतिबन्ध लागू गर्न दबाब कायम राख्नेछौँ। र, हामी तिनीहरूसँग व्यापार गर्ने सोच्ने जो कोहीलाई यी सम्झौताहरूको सम्भावित परिणामहरू बारे सचेत हुन सल्लाह दिन्छौं।”

उनले भने, ‘तर अर्कोतर्फ, इन्धन अभावको समस्यामा पाकिस्तानलाई सहयोग गर्नु अमेरिकाको प्राथमिकता हो । र हामी इन्धन सुरक्षाको बारेमा पाकिस्तान सरकारसँग वार्ता जारी राख्नेछौं।’

पाकिस्तान र इरानबीचको साढे सात अर्ब डलरको ग्यास पाइपलाइन परियोजना २०१३ मा पाकिस्तान पिपुल्स पार्टीको शासनकालको अन्तिम दिनमा तत्कालीन पाकिस्तानी राष्ट्रपति आसिफ अली जर्दारीले इरान भ्रमण गर्दा उद्घाटन गरिएको थियो।

सुरुमा यो परियोजनालाई पाकिस्तानी अधिकारीहरूले निकै महत्त्वपूर्ण भन्दै यसलाई पाकिस्तानको ऊर्जा सङ्कटको समाधानको रूपमा व्याख्या गरेका थिए।

तर यो आयोजना उद्घाटन भएको केही समयपछि नै इरानमाथिको अन्तर्राष्ट्रिय प्रतिबन्धका कारण यो गतिरोधको सिकार बन्यो ।