काठमाडौं। अमेरिकी राष्ट्रपति डोनाल्ड ट्रम्प र क्यानडाका प्रधानमन्त्री जस्टिन ट्रुडोले भन्सार शुल्कको बारेमा फोनमा कुराकानी गरेका छन्।

आफ्नो सामाजिक प्लेटफर्म ट्रुथ सोसलमा एक पोस्टमा यो जानकारी दिँदै ट्रम्पले ट्रुडोलाई ‘क्यानडाको गभर्नर’ भनेका छन्।

अमेरिकी राष्ट्रपतिले भने , “मैले क्यानाडाका गभर्नर जस्टिन ट्रुडोलाई भने- कमजोर सीमा नीतिका कारण हामीले सामना गरिरहेका समस्याहरूलाई उनले ठूलो मात्रामा बढावा दिएका छन्। यी नीतिहरू धेरै मानिसहरूको मृत्युको लागि जिम्मेवार छन्।”

“जस्टिन ट्रुडोले मलाई ट्यारिफको बारेमा के गर्न सकिन्छ भनेर सोध्न फोन गरे,” उनले लेखे।

“मैले उनलाई भनेको थिएँ – क्यानडा र मेक्सिकोबाट सीमा पार गर्दै आएको फेन्टानिलबाट धेरै मानिसहरूको मृत्यु भएको छ, र मैले यो रोकिएको देखाउने कुनै पनि कुरा फेला पार्न सकेको छैन,” ट्रम्पले भने।

“ट्रुडोले भने – अवस्था अहिले राम्रो छ, तर मैले उनलाई भनें – त्यो पर्याप्त छैन।”

ट्रम्पले कुराकानी केही हदसम्म मैत्रीपूर्ण तरिकाले समाप्त भएको बताए।

क्यानडामा भएको चुनावको बारेमा उनले भने, “ट्रुडोले क्यानडामा चुनाव कहिले हुँदैछ भनेर मलाई भन्न सकेनन्, जसले गर्दा मेरो जिज्ञासा बढ्यो, त्यसपछि मैले महसुस गरें – उनी सत्तामा रहन यो मुद्दालाई प्रयोग गर्न खोजिरहेका थिए।”

डोनाल्ड ट्रम्पले क्यानडा र मेक्सिकोबाट अमेरिका आउने उत्पादनहरूमा २५% कर लगाएका छन्।

यसपछि क्यानडाले पनि प्रतिशोधात्मक कर घोषणा गरेको छ। यो मुद्दा बाहेक, क्यानडालाई अमेरिकाको ५१ औं राज्य बनाउने ट्रम्पको दाबीले पनि दुई देशबीच तनाव सिर्जना गरेको छ।