काठमाडौं । अमेरिकाको टेक्सासमा अचानक आएको बाढीमा परी ४३ जनाको मृत्यु भएको छ। जसमा १५ बालबालिका पनि छन्। टेक्सास प्रशासनले बाँचेकाहरूको खोजी तीव्र गतिमा गरिरहेको छ।

शुक्रबार बिहान, धेरै मानिसहरू सुतिरहेको बेला ग्वाडालुपे नदीको पानीको स्तर एक घण्टा भन्दा कम समयमा आठ मिटरभन्दा बढीले बढ्यो।

केर काउन्टीका अधिकारीहरूले नदी किनारमा रहेको क्रिश्चियन युवा शिविरबाट २७ बालबालिका हराएको बताएका छन्। अहिलेसम्म करिब ८५० जनालाई उद्धार गरिएको छ।

मौसम विभागले आफ्नो पूर्वानुमानमा यस क्षेत्रमा थप वर्षा हुने सम्भावना रहेको बताएको छ। जसका कारण बाढीको सम्भावना पनि छ।

राष्ट्रिय मौसम सेवाले शनिबार उक्त क्षेत्रमा २ देखि ५ इन्च (५ देखि १२ सेन्टिमिटर) वर्षा हुन सक्ने बताएको छ। केही क्षेत्रमा १० इन्चसम्म वर्षा हुन सक्छ।

यस बाढीबाट मोबाइल होम, ग्रीष्मकालीन शिविर र शिविर स्थलहरू सबैभन्दा बढी प्रभावित भएका छन्। मानिसहरू जुलाई ४ को बिदा मनाउन यहाँ आएका थिए।

केर काउन्टीका शेरिफ ल्यारी एल. लेथाले सबैजना फेला नपरेसम्म अधिकारीहरूले खोजी जारी राख्ने बताए। बेपत्ता हुनेहरूमा ग्रीष्मकालीन शिविरमा भाग लिइरहेका २७ जना केटीहरू पनि समावेश छन्।

अमेरिकी राष्ट्रपति डोनाल्ड ट्रम्पले टेक्सासमा आएको बाढीको बारेमा ट्रुथ सोसलमा पोस्ट गरेका छन्।

उनले लेखेका छन्, “टेक्सासमा हिजो आएको विनाशकारी बाढीपछि राहत र उद्धार कार्यका लागि ट्रम्प प्रशासन राज्य र स्थानीय अधिकारीहरूसँग नजिकबाट काम गरिरहेको छ। अमेरिकी गृह सुरक्षा सचिव क्रिस्टी नोएम चाँडै त्यहाँ पुग्नुहुनेछ।”

क्रिस्टी नोएमले राष्ट्रपतिले पूर्ण सहयोगको वाचा गरेको र खोजी कार्यलाई तीव्र बनाउन तटरक्षक दल खटाइने बताइन्।