काठमाडौं । ह्वाइट हाउसकी प्रेस सचिव क्यारोलिन लेभिटले अमेरिकी राष्ट्रपति डोनाल्ड ट्रम्पलाई नोबेल शान्ति पुरस्कार दिने समय आएको बताएकी छिन्।

क्यारोलिन लेभिट भन्छिन् ‘राष्ट्रपति ट्रम्पले इजरायल-इरान र भारत-पाकिस्तान बीचको द्वन्द्व सहित छ वटा द्वन्द्वहरू समाप्त गरेका छन्।’

पत्रकार सम्मेलनमा उनले भनिन्, “डोनाल्ड ट्रम्पले अब थाइल्याण्ड र कम्बोडिया, इजरायल र इरान, रुवान्डा र कंगो गणराज्य, भारत-पाकिस्तान, सर्बिया र कोसोभो, इजिप्ट र इथियोपिया बीचको द्वन्द्व समाप्त गरिसकेका छन्।”

“यसको अर्थ राष्ट्रपति ट्रम्पले आफ्नो ६ महिनाको कार्यकालमा औसतमा महिनामा एउटा शान्ति सम्झौता वा युद्धविरामको मध्यस्थता गरेका छन्,” क्यारोलिन लेभिटले भनिन्।

उनले भनिन्, “अब राष्ट्रपति ट्रम्पलाई नोबेल शान्ति पुरस्कार दिने समय आएको छ।”

यसअघि पाकिस्तानका प्रधानमन्त्री शाहबाज शरीफ र इजरायलका प्रधानमन्त्री बेन्जामिन नेतान्याहूले पनि राष्ट्रपति ट्रम्पलाई नोबेल शान्ति पुरस्कार दिन सिफारिस गरेका थिए।