काठमाडौं । दक्षिण कोरियाको सरकारले जर्जियास्थित हुन्डाई प्लान्टमा भएको ठूलो अध्यागमन छापाको क्रममा पक्राउ परेका आफ्ना नागरिकहरूलाई रिहा गर्न अमेरिकासँग सम्झौता गरेको बताएको छ।

राष्ट्रपतिका प्रमुख कर्मचारीले भने – प्रशासनिक प्रक्रियाहरू पूरा हुने बित्तिकै, यी नागरिकहरूलाई देश फिर्ता ल्याउन चार्टर्ड विमान पठाइनेछ।

काङ हुन-सिकले भविष्यमा यस्ता घटनाहरू रोक्न भिसा प्रणालीमा सुधार गरिने बताए।

यस छापामा अमेरिकी अधिकारीहरूले कुल ४७५ जनालाई पक्राउ गरे। जसमध्ये ३०० भन्दा बढी दक्षिण कोरियाली नागरिक थिए।

अध्यागमन तथा भन्सार प्रवर्तन (आईसीई) का अधिकारीहरूले यी व्यक्तिहरू ब्याट्री उत्पादन गर्ने कारखानामा अवैध रूपमा काम गरिरहेको बताएका छन्।

ह्वाइट हाउसले कारबाहीको बचाउ गरेको छ र छापा मार्ने कार्यले विदेशी लगानीलाई हानि पुर्‍याउन सक्ने चिन्तालाई खारेज गरेको छ।

शुक्रबार छापा मारेपछि अमेरिकी राष्ट्रपति डोनाल्ड ट्रम्पले भने, “यी मानिसहरू अवैध आप्रवासी थिए र आइसीइले आफ्नो काम मात्र गरिरहेको थियो।”