काठमाडौं। काठमाडौं महानगरपालिकाले ऐतिहासिक तथा खुला क्षेत्र टुँडिखेललाई व्यवस्थित ‘घाँसे मैदान’ का रूपमा रूपान्तरण गर्ने कार्यको औपचारिक शुभारम्भ गरेको छ।

महानगरपालिकाको सार्वजनिक निर्माण विभागले टुँडिखेलको वातावरणीय र प्राकृतिक सुन्दरता बढाउने उद्देश्यका साथ यो विशेष परियोजना अघि बढाएको हो।

सहरी सौन्दर्यीकरण र खुला क्षेत्रको संरक्षण गर्ने महानगरको नीति अनुरूप सुरु गरिएको यस घाँसे मैदान निर्माण परियोजनाको कुल लागत २ करोड ४२ लाख रुपैयाँभन्दा बढी रहेको विभागले जनाएको छ।

परियोजना अन्तर्गत टुँडिखेलको भुइँलाई सम्याउने, दुबो तथा प्राकृतिक घाँस रोप्ने र हरियालीलाई दीर्घकालीन रूपमा जोगाइराख्न आवश्यक आधुनिक सिँचाइ प्रणालीको व्यवस्थापन गरिनेछ।